Ağasəlim Mircavadov: Baş məşqçiyə yekdilliklə inandığımızı göstərdik

Xəbər verdiyimiz kimi, bu gün AFFA-nın inzibati binasında Məşqçilər Komitəsinin iclası keçirilib. Azerisport.az xəbər verir ki, iclasda aparılmış müzakirələrdən sonra 21 yaşadək futbolçulardan ibarət Azərbaycan yığmasının Avropa çempionatının seçmə mərhələsindəki çıxışı ilə bağlı bir sıra qərarlar qəbul olunub.

Komitə üzvü Ağasəlim Mircavadov saytımıza açıqlamasında müzakirə olunan məsələlər və çıxarılan qərarlarla bağlı fikirlərini bölüşüb: "Biz yekdilliklə baş məşqçiyə inandığımızı nümayiş etdirdik. Yaşar Vahabzadə artıq 10 ildən çoxdur ki, məşqçi kimi çalışır. Gənclərdən ibarət yığmalarımızda çox çalışıb. O, bu uşaqları da çox yaxşı tanıyır. Əlbəttə, son oyunların nəticəsi sevindirmir. Amma qarşıda hələ seçmə mərhələnin növbəti oyunları var. Komandanı həmin oyunlara da Vahabzadə çıxaracaq.

Zədəli futbolçuların yoxlanılmasına gəlincə, bununla həkimlər məşğul olacaqlar. Burada söhbət heç də inamsızlıqdan getmir. Sadəcə, həkimlərin onları yoxlaması, nəzarətdə saxlaması lazımdır. Biz iclasda digər yığma komandalarımızla da bağlı müzakirələr apardıq. Sabah U-19-un baş məşqçisi Nazim Süleymanovla görüşəcəyik. Bu komandanın qarşıdakı AÇ-2016-nın seçmə mərhələ oyunlarına hazırlığının nə yerdə olduğunu görəcəyik. Hansı ki, millimizin yer aldığı qrupun oyunları Bakıda keçiriləcək".