Aslan Kərimovu meydandan qovan hakim Qəbələnin oyununda

Avropa Liqasının qrup mərhələsi çərçivəsində "Qəbələ" ilə Almaniyanın "Borussiya" klubu arasında keçiriləcək oyunu xorvatiyalı İvan Bebek idarə edəcək. Azerisport.az xəbər verir ki, bu, sözügedən referi üçün Bakıya ilk səfər olmayacaq.

Belə ki, o, vaxtilə "Neftçi"nin Çempionlar Liqasının 2005/06 mövsümünün birinci təsnifat mərhələsi çərçivəsində İslandiya "Hafnarfyordur"u ilə ev oyununu idarə edib. Həmin görüşdə komandamız 2:0 (səfərdə 2:1) hesabıyla qalib gəlmişdi. Bebek 3 sarı vərəqə çıxarmışdı ki, onlardan biri "Neftçi"nin vingeri Zaur Tağızadəyə göstərilmişdi.

Xorvat hakim AÇ-2008-in seçmə mərhələsi çərçivəsində Bakıda Azərbaycan və Portuqaliya arasında keçirilən oyunda (0:2) da idarəçilik edib. Həmin görüşdə Saşa Yunisoğluna sarı vərəqə göstərən Bebek Aslan Kərimovu da birbaşa qırmızı vərəqə ilə meydandan qovmuşdu.