Ruslan Abışov: Borussiya ilə oyunda uğur qazanmağa çox ümidliyik
"Qəbələ"nin müdafiəçisi Ruslan Abışov Topaz Premyer Liqasının 8-ci turu çərçivəsində "Neftçi"yə qarşı keçirdikləri oyunu (1:0) şərh edib. Azerisport.az saytına açıqlamasında o, bunları söyləyib:
"Çətin oyun olacağını bilirdik. "Neftçi"nin hazırda turnir cədvəlindəki mövqeyi yaxşı olmasa da, bu komanda həmişə iddialı olub. Onlar bu oyunda da iddialarını ortaya qoymağı bacardılar. Rəqib ən azından bir xal qazanmaq istəyirdi. Biz erkən qol vurmağı bacarsaydıq, "Neftçi" açıq futbol sərgiləyəcəkdi. Amma qol gec gəldi. Əsas odur ki, biz 3 xal qazanmağı bacardıq. Artıq bu oyunu unudub, qarşıdakı "Borussiya" (Dortmund, Almaniya) ilə oyunu düşünməliyik".
Abışov Avroliqanın qrup mərhələsi çərçivəsində keçirəcəkləri növbəti oyunla da bağlı fikirlərini bölüşüb: "Dortmundlularla oyun çətin olacaq. Amma bizim yaxşı baş məşqçimiz, komandamız var. Roman Qriqorçuk oyundan öncə bizə lazım olan tapşırıqları verəcək, biz isə onun dediklərini yerinə yetirməyə çalışacağıq. "Borussiya" ilə oyunda uğur qazanmağa çox ümidliyik".
