Anyete: Neftçi fanatları narazı olmaqda haqlıdırlar
"Neftçi"nin hücumçusu Anyete Topaz Premyer Liqasının 8-ci turu çərçivəsində "Qəbələ"yə qarşı oyundan (0:1) sonra azerisport.az saytının suallarını cavablandırıb.
- Oyun haqda nə deyə bilərsiniz?
- Siz də hamı kimi gördünüz ki, komandamız sonadək çalışdı. Amma təəssüf ki, son anda buraxdıığımız qol bütün əziyyətimizin üzərindən xətt çəkdi.
- Bəs komandada nə çatışmadı?
- "Neftçi" uğursuzluqla üzləşdi. Həm də bu, cari mövsümdə ilk belə hal deyil. Amma mən komandamızın doğru yolda olduğunu düşünürəm. Sadəcə, bizim bəxtimiz gətirmir.
- Komandanız hazırda 6-cı pillədə qərarlaşıb. Yəqin ki, bura gələrkən hər şeyin bu qədər pis alınacağınızı düşünmürdünüz...
- Əlbəttə. Mən böyük kluba gəldiyimi bilirdim. Amma həmişə belə olacağını düşünmürəm. İnanıram ki, indiki çətinlikləri geridə qoymağı bacaracağıq.
- Sona 15 dəqiqə qalmış meydana çıxdınız. Bir hücumçu kimi daha tez mübarizəyə qoşulmaq istəyiniz var idimi?
- Mən meydana çıxıb komandama kömək etmək istəyirdim. Amma meydanda olanlar da bunun üçün əllərindən gələni etdilər.
- Yəqin ki, azarkeşlərin komandanın çıxışından necə narazı qaldığını hiss etdiniz...
- Onlar bizdən narazı olmaqda haqlıdırlar. "Neftçi" belə vəziyyətdə olmalı klub deyil. Biz onların hisslərini başa düşürük və vəziyyəti dəyişməyə çalışacağıq.
