Coşqun Diniyev: Monako ilə səfər matçından yaxşı nəticə ilə qayıda bilərik
"Qarabağ"ın yarımmüdafüəçisi Coşqun Diniyev Topaz Premyer Liqasının 8-ci turu çərçivəsində "Zirə"yə qarşı keçirdikləri ev oyunundan (4:1) sonra azerisport.az saytının suallarını cavablandırıb.
- 4:1 hesablı qələbə sizin "Zirə" ilə oyunda elə də ciddi çətinlik çəkmədiyinizi göstərir...
- Oyunun çətin keçəcəyini bilirdik. Çünki "Zirə" də bizim kimi bu mövsüm hələ məğlubiyyətlə üzləşməmişdi. Bu üzdən oyuna ciddi hazırlaşmışdıq. Yeni arenamızda ilk qələbəmizi qazanmaq istəyirdik. Allaha şükürlər olsun ki, hər şey bizim istədiyimiz kimi oldu.
- "Qarabağ" matçın taleyini elə ilk yarıda həll etdi...
- Bəli, ilk yarıda üç qol vurmağa nail olduq. Amma "Zirə" elə komandadır ki, ikinci hissədə arxayınlaşsaydıq, bizi cəzalandıra bilərdi. Birinci hissədə biz qol vəziyyətlərindən yaxşı yararlandıq.
- Fasilədən sonra elə də fəal deyildiniz, daha çox top saxlamağa çalışırdınız...
- Bu, bizim oyun üslubumuzdur. Biz topu daha çox özümüzdə saxlamağa çalışırıq. İkinci yarıda fəal olmamağımızda yorğunluğun təsiri ola bilər. Üstəlik, hesab da xeyrimizə idi.
- Liderlik uğrunda "Qarabağ"ın əsas rəqibi "Qəbələ" görünür...
- Cəmi 8 tur geridə qalıb. Bizim hansı komandalarla çempionluq uğrunda mübarizə aparacağımızı indidən demək çətindir. Amma hamı deyir ki, bu mövsüm "Qarabağ"la "Qəbələ" çempionluğa əsas namizəddir. Bu mübarizədən qalib çıxmağa çalışacağıq.
- "Zirə"nin sizə məğlubiyyəti bu komandanın liderlər qrupunda yer almasının çətin olacağından xəbər vermir ki?
- Bu, bizim işimizdir. Biz hər matça üç xal üçün çıxırıq. Rəqibin kimliyinin bizim üçün fərqi yoxdur.
- Avropa Liqasının qrup mərhələsi çərçivəsində Fransa "Monako"su ilə matç öncəsi belə böyük hesablı qələbə komandadakı atmosferi daha da yaxşılaşdıra bilər?
- Əlbəttə. "Zirə" üzərindəki qələbə bizim üçün vacib idi.
- "Monako" Fransa çempionatında elə də yaxşı çıxış etmir. Bunu sizin üçün üstünlük saymaq olar?
- Onların uğursuz çıxışına baxmayaraq, "Monako" adlı-sanlı klubdur, zəngin tarixə malikdir. Bizi onlarla çox çətin oyun gözləyir. Üstəlik, oyun səfərdə olacaq. Rəqibi yaxşı analiz etməyə, güclü və zəif cəhətlərini öyrənməyə çalışacağıq. Uğurlu nəticə ilə qayıtmağa çalışacağıq.
- "Qarabağ" ötən mövsüm Fransanın daha məşhur klubu "Sent-Etyen"lə həm səfərdə, həm də evdə heç-heçə etmişdi...
- Elə qrupumuz var ki, istənilən komanda digərinə qalib gələ bilər. 90 dəqiqə ərzində meydanda kim daha yaxşı təsir bağışlayırsa, o da qalib gəlir.
- AÇ-2016-nın seçmə mərhələsi çərçivəsində keçirilmiş Azərbaycan - İtaliya matçı göstərdi ki, Stefan Əl Şaaravini saxlamaq çox çətindir. Böyük ehtimalla o, "Monako"nun heyətində də sizə qarşı oynayacaq. Onu necə dayandırmağı düşünürsünüz?
- Əl Şaaravi dünyanın ulduz futbolçularından hesab olunur. Amma qarşısıalınmaz deyil. "Qarabağ"ın ondan qorxmasına ehtiyac olduğunu düşünmürəm. Düzdür, təhlükəli oyunçudur. Amma biz komanda oyunu sərgiləyə bilsək, Monakodan yaxşı nəticə ilə qayıda bilərik.
- Reynaldonun yoxluğu çıxışınıza təsir edə bilər?
- Oyunumuza təsir edə bilər, amma motivasiyaya yox. Bizim onu əvəzləyə biləcək futbolçularımız var. Bu barədə baş məşqçi də danışıb. Biz Reynaldosuz da "Monako"ya qarşı yaxşı çıxış etməliyik.
