Neftçi Samir Əliyevin istefasını qəbul etmədi

Topaz Premyer Liqasının 8-ci turu çərçivəsində təşkil olunmuş “Neftçi” - “Qəbələ” (0:1) matçının 90-cı dəqiqəsində buraxılmış qolla məğlub olan (0:1) paytaxt klubunun baş məşqçisi Samir Əliyev oyun sonrası mətbuat konfransında vəzifəsindən istefa verəcəyini bildirmişdi. Azerisport.az xəbər verir ki, matçdan sonra klubun inzibati binasında baş məşqçi Samir Əliyevin də iştirakı ilə Müşahidə Şurasının iclası keçirilib.

İclasda ümumilikdə komanda ətrafında müzakirələr aparılıb və baş məşqçi Samir Əliyevin fikirləri dinlənilib. Müşahidə Şurası tərəfindən baş məşqçinin diqqətinə çatdırılıb ki, “Neftçi”nin yaxın gələcək üçün strateji hədəfləri var və bu məqsədlərə məhz Samir Əliyevlə çatmaq niyyətindədirlər. Nəticə olaraq baş məşqçi Samir Əliyevin istefası Müşahidə Şurası tərəfindən qəbul olunmayıb. O, baş məşqçi vəzifəsində fəaliyyətini davam etdirəcək.