Murad Ağayev: İnterlə oyunumuzun asan keçməyəcəyini bilirik
"Sumqayıt"ın yarımmüdafiəçisi Murad Ağayev Topaz Premyer Liqasının 8-ci turu çərçivəsində "İnter"ə qarşı keçirəcəkləri oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Komandamıza yeni baş məşqçi təyin olunub. Samir Abasov ilk dəfə Premyer Liqada baş məşqçi kimi komanda meydana çıxaracaq. Onun komandamızla müsbət nəticəyə imza atmaq, turnir cədvəlində irəliləmək arzusu bizə kömək edəcək. Əbəs yerə deyil ki, uşaqların hamısı məşqlərdə böyük həvəslə çalışırlar. Qarşıdakı oyuna gəlincə, hamımız "İnter"in necə güclü rəqib olduğunu bilirik. Bizi asan oyun gözləmir. Amma buna baxmayaraq, uğurlu nəticə qazanmaq üçün çalışacağıq. Geridə qalan oyunlara nəzər salsaq, bizim bəxtimizin gətirmədiyini demək olar. 7 oyunda 4 qırmızı vərəqə almışıq. AZAL və "Qəbələ" ilə oyunlarda bəxtimiz gətirmədi. AZAL-a qalib gələcəyimiz halda, son saniyələrdə səhvə yol verdik. Elə "Qəbələ" ilə matçın da sonlarında üstünlüyümüzü əldən verdik".
