Fizuli Məmmədov: Kamran Ağayev imkanlarından aşağı çıxış etdi

Azərbaycan yığmasının sabiq futbolçusu Fizuli Məmmədov millimizin AÇ-2016-nın seçmə mərhələsi çərçivəsində Bolqarıstana qarşı keçirdiyi oyunu şərh edib. Azerisport.az saytına açıqlamasında o, 0:2 hesablı məğlubiyyətlə bağlı bunları söyləyib:

"Bolqarıstanla oyunda yığmamızın heyətində dəyişikliklər var idi. Müdafiənin mərkəzində Bədavi Hüseynov yox idi. Maksim Medvedev solda çıxış edirdi. Arif Daşdəmirov start heyətdə yer almamışdı, o, ikinci yarıda Maksimi əvəzlədi. Baş məşqçi Robert Prosineçki gənc Elnur Cəfərova start heyətdə yer vermişdi. Həm də bu oyunda hiss olunurdu ki, futbolçularımız bolqarlarla görüşə tam bərpa ola bilməyiblər. Futbolçularımz mövqe səhvlərinə yol verirdilər. Bu da qapımıza vurulan iki qolla nəticələndi. Kamran Ağayev də öz imkanlarından aşağı çıxış etdi. Halbuki, onun komandamızı qollardan xilas etməsinə alışmışıq. Bir sözlə, səhvlər bütün mövqelərdə var idi. Ruslan Qurbanovdan hücumda daha məhsuldar oyun gözləyirdim".