Topaz Premyer Liqasında 8-ci tur həyəcanı
Bu həftə Topaz Premyer Liqasında 8-ci turun oyunları keçiriləcək. Azerisport.az xəbər verir ki, milli komandaların qarşılaşmaları ilə əlaqədar yaranan fasilədən sonra baş tutacaq tur 3 gün davam edəcək.
İlk oyun günündə bir görüş baş tutacaq. “Rəvan” doğma meydanda “Kəpəz”lə qarşılaşacaq. Bu komandalar indiyə qədər 8 oyunda üz-üzə gəliblər ki, onların 3-də "aslanlar", 5-də isə gəncəlilər qələbəyə seviniblər. Bir sözlə, bu iki klub indiyə qədər heç-heçə etməyib. “Kəpəz” ardıcıl 3 oyundur qalib gələ bilmir. “Rəvan”ın meydanındakı bütün oyunlarda 3 və daha çox qol vurulub. Paytaxt təmsilçisi bu qarşılaşmaların 4-də də qol sevinci yaşayıb. Qələbə sayında bölgə təmsilçisi üstün olsa da, top fərqində bakılıların üstünlüyü var - 15:12. Bu oyunda "Kəpəz"i favorit saymaq olar. Çünki sonuncu pillədə qərarlaşan Emin Quliyevin komandası ilə müqayisədə, Şahin Diniyevin çalışdırdığı kollektiv 8 xalla altıncı pillədə qərarlaşıb. "Rəvan"ın bu görüşdə 1 xal qazanması da meydan sahibləri üçün uğur sayıla bilər. Amma "aslanlar"ın bu tur ilk qələbəsini qazanması da istisna olunmur.
İkinci oyun günündə prinsipial görüşlər baş tutacaq. Belə ki, “Neftçi” “Qəbələ”ni, "Qarabağ" isə "Zirə"ni qəbul edəcək. Qeyri-sabit çıxışı ilə diqqət çəkən "ağ-qaralar" liderlər qrupundan ayrı düşdüyündən ikinci pillədə qərarlaşan "Qəbələ"ni mütləq məğlub yola salmalıdır. Amma bir neçə gün sonra Avropa Liqasının qrup mərhələsinin üçüncü turu çərçivəsində Almaniyanın "Borussiya" (Dortmund) klubunu qəbul edəcək Roman Qriqorçukun komandası belə vacib matç öncəsi düşərgədəki ab-havanı daha da yaxşılaşdırmaq üçün Bakıya 3 xal üçün gəlir. Bu komandalar arasında indiyə qədər 28 oyun baş tutub ki, onların 13-də bakılılar, 8-də isə qəbələlilər qalib gəliblər. Daha 7 qarşılaşmada heç-heçə qeydə alınıb. Top fərqində də bakılıların ciddi üstünlüyü var - 39:27. Son 6 qarşılaşmada meydan sahibi olan komanda qalib gəlməyib. Son 11 oyundan 9-da hər iki komanda qol vurub.
"Qəbələ" və "Neftçi"dən fərqli, “Qarabağ”la “Zirə” indiyədək qarşılaşmayıblar. Amma bu görüşə kifayət qədər böyük maraq var. Çünki hər iki komanda hazırda liderlər qrupunda qərarlaşıb. Ağdam klubu ilk pillədə yer alıbsa, zirəlilər bu komandadan cəmi iki xal geri qalır və üçüncü sıradadır. Maraqlıdır ki, həm Qurban Qurbanovun, həm də Adil Şükürovun kollektivi hələ cari mövsümdə məğlubiyyətlə üzləşməyib. Bir sözlə, bu görüş iki məğlubiyyət tanımayan komandanın dueli kimi qiymətləndirilə bilər.
Son oyun günündə də iki qarşılaşma keçiriləcək. Əvvəlcə “Xəzər Lənkəran” ev oyununda AZAL-la münasibətlərinə aydınlıq gətirəcək. Bu iki klub 28 dəfə qarşılaşıblar. Həmin oyunlarda cənubluların böyük üstünlüyü var. 14 dəfə bu komanda qalib gəlibsə, cəmi 5 dəfə "təyyarəçilər" 3 xala seviniblər. 9 dəfə isə tərəflər meydanı 1 xalla tərk ediblər. Top fərqində də "ağ-yaşıllar" üstündürlər - 36:22. Rəqiblərin son 8 oyununda qonaq komanda qalib gəlməyib. “Xəzər Lənkəran” ardıcıl 9 matçdır meydanı qolsuz tərk etmir. Turnir cədvəlində qonşu pillələrdə qərarlaşan komandaların duelində kimisə favorit göstərmək çətindir. Bu üzdən də meydanda maraqlı mübarizə görəcəyimiz şübhəsizdir.
Nəhayət, turun qapanış matçında “Sumqayıt” “İnter”i qəbul edəcək. Sumqayıtın eyniadlı klubu indiyədək cəmi 1 dəfə qalib gəlsə də, son 3 oyunda uduzmayıb. “İnter” səfərdəki 6 matçdan yalnız birində qol buraxıb. Bakılılar əvvəlki 12 oyundan 8-də qalib gəliblər. Elə top fərqində də "İnter" üstündür - 18:4. Bakılılar liderlər qrupunda mövqelərini qorumaq üçün səfərdən qələbə ilə qayıtmağa çalışacaq. Amma bir neçə gün öncə yeni baş məşqçiyə - Samir Abasova tapşırılan sumqayıtlıların da bu görüşdə böyük istəklə mübarizə aparacağını proqnozlaşdırmaq olar.
Topaz Premyer Liqası
8-ci tur
16 oktyabr (cümə)
20:30. “Rəvan” - “Kəpəz”
Hakimlər: Orxan Məmmədov, Yaşar Abbasov, Mübariz Haşımov, Munis Abdullayev.
AFFA nümayəndəsi: Vaqif Davudov.
Hakim-inspektor: Füzuli Nəcəfov.
Bakı. “Bayıl Arena”.
17 oktyabr (şənbə)
15:30. “Neftçi” - “Qəbələ”
Hakimlər: Rəhim Həsənov, Namiq Hüseynov, Akif Əmirəli, Rəvan Həmzəzadə.
AFFA nümayəndəsi: Mübariz Hüseynov.
Hakim-inspektor: Gülağa Cabarov.
Bakı. İsmət Qayıbov adına Bakıxanov qəsəbə stadionu.
18:00. “Qarabağ” - “Zirə”
Hakimlər: Ramil Diniyev, Azər Əsgərov, Nahid Əliyev, Ramil Əhmədov.
AFFA nümayəndəsi: Rauf Əmirov.
Hakim-inspektor: Vüsal Əliyev.
Bakı. Tofiq İsmayılov adına Suraxanı qəsəbə stadionu.
18 oktyabr (bazar)
18:00. “Xəzər Lənkəran” - AZAL
Hakimlər: Elvin Əsgərov, Mehman Mahmudov, Cavanşir Yusifov, Ziya Nəsirov.
AFFA nümayəndəsi: Maşallah Əhmədov.
Hakim-inspektor: Əhmədağa Cabbarov.
“Xəzər Lənkəran” mərkəzi stadionu.
20:00. “Sumqayıt” - “İnter”
Hakimlər: Ömər Paşayev, Vaqif Musayev, Elman Musayev, Nail Nağıyev.
AFFA nümayəndəsi: Adil Nadirov.
Hakim-inspektor: Murad Məmmədov.
Sumqayıt. “Kapital Bank Arena”.
Bombardirlər:
4 - Aleksey Qay ("Qəbələ").
3 - Rahid Əmirquliyev ("Xəzər Lənkəran"), Dieqo Martins ("İnter"), Riçard Almeyda ("Qarabağ"), Aleksey Antonov ("Qəbələ").
