Əfran İsmayılov: Belə zəif çıxış edəcəyimizi gözləmirdim
Azərbaycan yığmasının yarımmüdafiəçisi Əfran İsmayılov AÇ-2016-nın seçmə mərhələsi çərçivəsində Bolqarıstana qarşı keçirilmiş oyundan (0:2) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Bu oyundan üç gün öncə İtaliya ilə ağır oyuna çıxmışdıq. Buna baxmayaraq, bütün gücümüzü toplayıb, Sofiyada da yaxşı oyun sərgiləmək, nəticə qazanmaq istəyirdik. Amma alınmadı. Birinci hissədə çox zəif oynadıq. İkinci hissədə oyunda dönüş yaratmağa çalışsaq da, bu cəhdlərimiz də faydasız qaldı. Bu, tsiklin son oyunu idi. Artıq geridə qalan seçmə mərhələni unudub, növbəti tsikl barədə düşünməliyik. Qarşıda bizi daha maraqlı və vacib oyunlar gözləyir.
- Kənardan yığmamız çox istəksiz görünürdü...
- Elə deməzdim. Böyük ehtimalla zəif çıxış etdiyimiz üçün elə təəssürat yaranıb. Etiraf edim ki, belə zəif çıxış edəcəyimizi gözləmirdim. Bu oyundan nəticə çıxarmalıyıq. İtaliyaya qarşı daha yaxşı oynamışdıq.
- Ola bilər ki, bolqarlara qarşı düzgün taktika seçilməmişdi?
- Bu, baş məşqçinin işidir. Ona görə də bu barədə heç nə deyə bilmərəm.
- Bütövlükdə, seçmə mərhələni yığmamız üçün necə qiymətləndirərdiniz?
- Seçmə mərhələni iki hissəyə bölmək olar. Birinci hissə Berti Foqtsun dövrünə təsadüf edirdi, ikinci hissə isə Robert Prosineçkinin. Hamı yaxşı bilir ki Foqtsun dövrünə təsadüf edən ilk dörd oyunumuzun hamısında məğlub olmuşduq. Bunun da nəticəsi kimi almaniyalı mütəxəssis baş məşqçi postundan istefa verdi. Robert Prosineçkinin dövründə isə daha uğurlu çıxış etdik. Daha çox xal toplaya bilərdik. Yeni baş məşqçi ilə inkişaf hiss olunur.
- Növbəti tsikldə yığmamızın kapitanı Rəşad Sadıqovsuz oynaya bilərsiniz...
- O, mənim ən yaxın dostlarımdan biridir. Təlim-məşq toplanışlarında bir otaqda qalırıq. O, əsl peşəkardır. Tutaq ki, Rəşad yığmadan getdi. Müdafiədə ancaq Ruslan Abışovla Bədavi Hüseynov qalacaq. Onların da heç biri cəzadan, zədədən sığortalanmayıb. Belə olan halda nə edəcəyik? Rəşad yığmamız üçün nəinki meydanda, hətta ondan qıraqda da əsl liderdir. Hesab edirəm ki, o, yığmada qalmalıdır. Sadıqov bizə çox şey verə bilər.
