Qriqorçuk: Borussiya ilə oyun ikinci plandadır, bizi öncə Neftçi ilə oyun gözləyir
"Qəbələ"nin baş məşqçisi Roman Qriqorçuk Topaz Premyer Liqasının 8-ci turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb.
- AÇ-2016-nın seçmə mərhələ oyunları ilə əlaqədar yaranmış fasilədən necə yararlandınız?
- Bir qədər istirahət etdik. "Qarabağ"la yoxlama oyunu (2:1) keçirdik. İndi isə "Neftçi" ilə oyuna hazırlaşırıq. Komandadan çox razıyam. Uşaqlar hazırlığa ciddi yanaşırlar. Komand üzvlərinə işlərinə belə ciddi yanaşdıqlarına görə təşəkkürümü də bildirmişəm.
- "Neftçi" ilə görüşdən nə gözləyirsiniz? Bakılılar qeyri-sabit çıxış edirlər...
- Çox yaxşı komandadır. Onlar yaxşı futbol sərgiləməyə çalışırlar. Belə komandalara qarşı oynamaq çox çətindir. Bizi necə çətin oyun gözlədiyini başa düşürük.
- Sizi ən çox narahat edən nədir?
- Əsas hədəfimiz "Neftçi"yə istədiyi futbolu sərgiləməyə imkan verməməkdir. Onlara belə imkan yaratsaq, bizə çox çətin olacaq.
- Yəqin ki, rəqibi öyrənərkən bu komandanın "Qarabağ"a qarşı oyununu da izləmisiniz...
- Növbəti rəqibimizin bir neçə oyununa baxmışam. Amma məhz "Qarabağ"la oyunlarından başlamışam. Digər oyunlarını da izlədim ki, əslində necə təsir bağışladıqlarını bilim.
- Yığma komandalara gedən futbolçularınız hansı vəziyyətdə geri dönüblər?
- Azərbaycan yığmasına gedən futbolçuların Sofiyadan ötən gün qayıdıblar. Onlara daha bir istirahət günü vermişik. Çünki onların evlərində olması lazımdır. Bu gün isə Qəbələyə gələcəklər. Estoniya yığmasının hücumçusu Sergey Zenyov yaxşı vəziyyətdə qayıdıb. Ermin Zets isə Bosniya və Herseqovina yığmasından zədəli dönüb. Onun qarşıdakı oyuna qədər hazır olub-olmayacağını bilmirik.
- "Neftçi" ilə oyundan beş gün sonra sizi Avropa Liqasının qrup mərhələsi çərçivəsində Dortmund "Borussiya"sı ilə ev oyunu gözləyir. Bu üzdən demək olar ki, "Neftçi"yə qarşı da əsas heyət oyunçularını buraxacaqsınız?
- Bu, bizim prinsipimizdir. Onu istənilən halda dəyişməyə hazırlaşmırıq. İşə ən düzgün yanaşma da budur.
- Artıq Almaniya klubu ilə oyunu düşünməyə başlamısınız?
- Xeyr. Düzdür, mənim vaxtım var idi və "Borussiya" barədə çoxlu material toplamışam. Futbolçulara bu komanda ilə oyun ərəfəsində göstərəcəyim bütün materialları hazırlamışam. Amma bu, hələlik, ikinci yerdədir. Çünki bizi qarşıda "Neftçi" ilə oyun gözləyir. Bizə bakılılar üzərində qələbə qazanmaq lazımdır. Buna nail olmaq isə çox çətin olacaq. Ona görə də bütün diqqətimiz bu görüşə yönəlib.
