Məhəmməd Mirzəbəyov: Hər kəsdən belə oyuna görə üzr istəyirəm
Azərbaycan yığmasının müdafiəçisi Məhəmməd Mirzəbəyov AÇ-2016-nın seçmə mərhələsi çərçivəsində Bolqarıstana qarşı keçirilmiş son oyundan (0:2) danışıb. Azerisport.az saytına açıqlamasında o, bunları söyləyib:
"Çətin oyun oldu. Biz bu görüşdə çoxlu səhvə yol verdik. Oyunumuz alınmadı. Niyə belə olduğunu bilmirəm. Öz oyunumuzu sərgiləyə bilsəydik, nəticə tamamilə fərqli ola bilərdi. Təəssüf ki, alınmadı. Belə oyunlarda yorğunluğu bəhanə edib, məğlubiyyətə haqq qazandırmaq olmaz. Hər kəsdən belə oyuna görə üzr istəyirəm. Xüsusilə birinci hissədə bizdə heç nə alınmadı. İkinci yarıda oyuna nəzarət etdik, qol vəziyyətləri yaratmağa çalışdıq. Amma ikinci qolu buraxdıq. Standart vəziyyətlərlə bağlı problemimizin olduğunu deməzdim. Növbəti oyunlarda daha yaxşı çıxış etməyə çalışacağıq".
