Qara Qarayev: Yorğunluq Sofiyadakı məğlubiyyətin yeganə səbəbi deyil
Azərbaycan yığmasının yarımmüdafiəçisi Qara Qarayev AÇ-2016-nın seçmə mərhələsi çərçivəsində Bolqarıstana qarşı səfər oyunundan (0:2) sonra azerisport.az saytının suallarını cavablandırıb.
- Robert Prosineçki oyundan sonrakı mətbuat konfransında bildirdi ki, millimiz onun rəhbərliyi altında ən zəif matçını keçirdi...
- Onunla razıyam. Matçın əvvəlində elə təəssürat yaranırdı ki, sanki biz bütün gücümüzü İtaliya ilə əvvəlki oyunda qoymuşuq. Bu görüşə hazırlaşmışdıq. Amma bunun üçün vaxtımız az idi. Bolqarıstanla görüşün səfərdə keçirilməsi də əlavə çətinlik yaradırdı.
- Deməli, siz bu uğursuzluğu yorğunluqla əlaqələndirirsiniz? Amma kənardan komanda çox istəksiz görünürdü...
- Yorğun olanda bütün bacarığını nümayiş etdirmək çətinləşir. İstəsən də belə, alınmır. Amma yorğunluq yeganə səbəb deyil. Biz bu dəfə də xeyli səhvə yol verdik. Əks-hücumlar qura bilmədik.
- Meydanda çox sərt mübarizə gedirdi və hərdən bu, kobudluğa keçirdi...
- Hərdən nəyəsə nail ola bilməyəndə əsəbləşirsən. Amma təbii ki, meydanda aqressiyaya yol vermək lazım deyil.
- Bu sual sizə əbəs yerə verilmədi. Çünki siz bu baxımdan yığmamızda ən fəallardan idiniz. Sizin bəzi hərəkətləriniz qaydalar çərçivəsindən kənara çıxırdı və bu, qırmızı vərəqə ilə də nəticələ bilərdi.
- Özümə haqq qazandıra bilərəm (gülür)?
- Buyurun...
- Rəqib bizim futbolçuları çox tez-tez təxribata çəkirdi. Bolqarlar meydanda çox danışırdılar. Hakimdən mənə vərəqə verməyi tələb edirdilər. Baxmayaraq ki, mən o dərəcədə kobudluq etməmişdim. Hesabda geridə olarkən belə hərəkətlər adama təsir edir.
- Ötən tsikldə yığmamız 9 xal topladı, qrup dördüncüsü oldu. Amma bu mövsüm 6 xalla 5-ci yer. Bu, uğursuzluq sayıla bilər?
- Tsiklin əvvəlini çox uğursuz keçirməsəydik, ardıcıl dörd oyunda uduzmasaydıq, hər şey fərqli alına bilərdi. Belə olan halda ötən tsikldəki rekordumuzu yeniləyə də bilərdik. Məsələn, öz meydanımızda Bolqarıstan və Norveçə qalib gəlməliydik.
- Növbəti seçmə mərhələdə nəticə daha yaxşı ola bilər?
- Komandamız indi daha təcrübəlidir. Qeyri-sabitliyə son qoya bilsək, nəticələrimizin yaxşılaşması mümkündür. Çətin qrupa düşmüşük. Amma tsiklin əvvəlində vacib xallar itirməsək, böyük uğura imza ata bilərik.
