Ruslan Qurbanov: Sofiyada uduzmamağa çalışacağıq
Azərbaycan yığmasının hücumçusu Ruslan Qurbanov AÇ-2016-nın seçmə mərhələsi çərçivəsində Bolqarıstana qarşı səfər oyunu öncəsi azerisport.az saytının suallarını cavablandırıb.
- Bolqarıstanla oyuna hazırsınız?
- Əlbəttə. Baxmayaraq ki, İtaliya ilə oyundan sonra müəyyən yorğunluq var.
- Sofiyada hansı nəticəyə ümid edirsiniz?
- Bu oyunda ən azı uduzmamağa çalışacağıq. İmkan olarsa, qələbəyə oynayacağıq. Seçmə mərhələni major notlarla başa vurmaq istəyirik.
- Bolqarlara Bakıda məğlub olmuşdunuz. Qisas hissi var?
- Öz oyunumuzu sərgiləyib, uğurlu nəticə qazanmağa çalışacağıq. Bunun üçün sonadək mübarizə aparacağıq.
- İtaliya ilə oyun barədə nə deyə bilərsiniz?
- Çox ağır oyun oldu. Azarkeşlər tərəfindən möhtəşəm dəstək var idi. Oyuna gələn hər kəsə təşəkkürümü bildirirəm. Biz oyuna pis başlamamışdıq. Amma təəssüf ki, erkən qol buraxdıq. Yaxşı ki, buna vaxtında cavab verə bildik. Amma heç-heçə hesabını fasiləyə qədər qoruya bilmədik. İtaliya növbəti dəfə göstərdi ki, əbəs yerə dördqat dünya çempionu deyil.
- Yığmamız niyə effektli hücumlar qura bilmirdi?
- Biz hücum qurmaqdan qorxmurduq. Sadəcə, hər şey bizim istədiyimiz kimi alınmırdı. Çox çalışsaq da, təəssüf ki, uğursuz alındı.
- İtaliyaya vurulan yeganə qolda sizin də xidmətiniz oldu...
- Həmin epizodda sonadək mübarizə apardım və təkbətək mübarizədən qalib ayrıldım. Dmitri Nazarova sadəcə, qapıya dəqiq zərbə vurmaq qalırdı ki, o da bunu bacardı.
- Yığmamız hələ İtaliya kimi rəqiblərdən xal ala biləcək gücdə deyil?
- Azarkeşlərimizi sevindirməyi çox istəyirdik. Bunun üçün böyük istək var idi. Amma rəqibin səviyyəcə daha üstün olması həlledici oldu. İtaliya doğrudan da çox güclü rəqibdir. Antonio Konte superkomanda formalaşdırıb. Onlara Fransada keçiriləcək Avropa çempionatında uğurlar arzulayıram.
