Ağasəlim Mircavadov: Baş məşqçinin qalıb-qalmayacağına AFFA rəhbərliyi qərar verəcək

AFFA Məşqçilər Komitəsinin üzvü Ağasəlim Mircavadovun azerisport.az saytına müsahibəsi

- Öncə Azərbaycan - İtaliya matçı ilə bağlı fikirlərinizi bilmək istəyərdik...
- Mən də stadiondaydım. Arena çox gözəldir. Amma Bakı Olimpiya stadionunda futbol matçlarının təşkili baxımından çatışmazlıqlar da var. Məsələn, tribunalar meydana çox uzaqdır. Oyuna gəlincə, uşaqlar bacardıqlarını nümayiş etdirdilər. Qol vurmaq üçün şanslarımız oldu. Amma çox asan qollar buraxdıq. İki qol mərkəzdən qurulan hücumlar nəticəsində vuruldu. Baxmayaraq ki, rəqib xüsusi pressinq tətbiq etmirdi. Biz ideal qol vurduq. O qədər səhvə yol verməsəydik, üç qol buraxmaya bilərdik.

- Bu səhvlər olmasa, millimiz Bolqarıstana qalib gələ bilər?
- Çatışmazlıq ondan ibarətdir ki, oyunlar arasında çox az fasilə var. Tez bərpa olunmaq lazımdır. Komandamız buna nail ola bilsə, uğur qazana bilər.

- Bolqarların baş məşqçisi bildirib ki, Azərbaycanla oyunda gənclərə şans verəcək...
- Gəlin rəqib baş məşqçinin sözlərinə inanmayaq. O, çox söz danışa bilər. Buna böyük önəm vermək əvəzinə, özümüz ciddi hazırlaşmalıyıq. Tarixdə bizim kimə qarşı oynadığımız yox, nəticə qalacaq.

- Azərbaycanın gənclərdən ibarət yığma komandası Avstriyaya 0:7 hesabıyla uduzdu. Yaşar Vahabzadənin U-21 yığmasının baş məşqçisi postuna Məşqçilər Komitəsinin rəyi sayəsində təyin olunduğunu nəzərə alsaq, siz də məsuliyyət daşıyırsınız. Razısınız?
- Bəli, bu nəticəyə görə biz də məsuliyyət daşıyırıq. Biz Vahabzadəni dəstəkləyəcəyik. Unutmayaq ki, o, 10 ildən çoxdur gənclərlə çalışır. Onun bu sahədə böyük təcrübəsi var. Amma Vahabzadə Məşqçilər Komitəsinin təklif etdiyi dörd namizəddən biri idi.

- Belə nəticə gözləyirdiniz?
- Təbii ki, yox. Qeyd etmək lazımdır ki, müxtəlif səbəblərdən yığmamızın yeddi üzvü komanda ilə birgə səfərə yollana bilməmişdi. Həmin oyunçularla da söhbətim olub. İkisi zədəlidir. Baş məşqçinin heyətlə bağlı problemləri var idi. Amma bu, belə məğlubiyyətə haqq qazandıra bilməz. Vahabzadə komandanın ilk yarıda yaxşı çıxış etdiyini bildirdi. Hər şey ikinci hissədə baş verib.

- Vahabzadə istefaya göndərilə bilər?
- Buna artıq AFFA rəhbərliyi qərar verəcək. Sabah yığmamızı Finlandiya ilə oyun gözləyir. Biz də komanda ilə olacağıq, söhbət edəcəyik. Amma bu, sadəcə, komandaya oyun öncəsi dəstək vermək üçündür. Vahabzadənin bundan sonra da yığmada çalışıb-çalışmayacağına isə AFFA rəhbərliyi qərar verməlidir.