Rahid Əmirquliyev: Baş məşqçi oyunumuzdan razı qala bilər, amma biz səhvlər etdik

Azərbaycan yığmasının yarımmüdafiəçisi Rahid Əmirquliyev AÇ-2016-nın seçmə mərhələsi çərçivəsində İtaliyaya qarşı oyundan (1:3) sonra azerisport.az saytının suallarını cavablandırıb.

- Oyunla bağlı nə deyə bilərsiniz?
- Çətin oyun alındı. Belə olacağını öncədən də bilirdik. Buna baxmayaraq, layiqli oyun sərgiləmək, stadiona gəlmiş çoxsaylı azarkeşlərimizi sevindirmək istəyirdik. Nə bacarırdıqsa, etdik. İtaliya yığmasının imkan verdiyi qədər oynaya bildik.

- Ola bilər ki, siz bu rəqibə qarşı daha yaxşı oynaya bilərdiniz, amma yeni stadionda meydana çıxmağınız buna mane oldu?
- Çətin. Şəxsən məndə heç bir həyəcan yox idi. Sadəcə, rəqib komanda çox güclü idi. Bu, məğlubiyyətimizin yeganə səbəbidir.

- Olimpiya stadionunda oynamaq daha xoşdur, ya Tofiq Bəhramov adına respublika stadionunda?
- Mənim fikrimcə, ən yaxşısı "Bakcell Arena"da oynamaqdır (gülür). Amma ciddi olsaq, bizim oyunumuzu stadionla əlaqələndirməzdim. Bizə qarşı İtaliya yığması oynayırdı.

- Deməli, nəticə oyuna görədir?
- Rəqib bizdən daha yaxşı oynadı və layiqli qələbə qazandı.

- İkinci hissədə siz də qol vurmağa yaxın idiniz...
- Təəssüf ki, alınmadı. Bütövlükdə, qol vəziyyətlərimiz oldu. Onlardan maksimum yararlanmaq istəyirdik. Amma cəmi bir qol vura bildik.

- Bolqarıstana da qarşı belə oynasaq, nəyəsə nail ola bilərik?
- Belə oynasaq, çətin olacaq. Səhvlərimizdən nəticə çıxarmalı, daha yaxşı oynamalıyıq.

- Amma baş məşqçi Robert Prosineçki İtaliyaya qarşı oyundan razı qaldığını deyib...
- O, razı qala bilər. Amma biz öz səhvlərimiz nəticəsində qollar buraxdıq. Belə səhvlərə yol vermək olmaz.

- Bədavi Hüseynovun yoxluğu hiss olunacaq?
- Bizim başqa müdafiəçilərimiz də var. Məsələn, Ruslan Abışov. Bədavinin yoxluğu itkidir, amma Ruslan onu layiqincə əvəz edə bilər.