Məhəmməd Mirzəbəyov: Baş məşqçi İtaliyaya qarşı necə oynamaq lazım olduğunu daha yaxşı bilir

Azərbaycan yığmasının və "Qəbələ"nin müdafiəçisi Məhəmməd Mirzəbəyovun azerisport.az saytına müsahibəsi

- İtaliya ilə oyuna hazırlıq necə keçdi?
- Hər şey yaxşı alındı. Komandamızda böyük motivasiya var. İtaliya ilə oyuna ciddi hazırlaşmışıq.

- Qarşıdakı görüşdən nə gözləyirsiniz?
- Rəqibin çox intizamlı komandası var. Onların oyununu mümkün qədər yaxşı analiz etməyə çalışmışıq. İtaliya yığması barədə çox danışmağa ehtiyac yoxdur. Hamı gözəl bilir ki, bu komanda nə dərəcədə güclüdür.

- Sizcə, bu rəqibdən xal almaq üçün necə oynamaq lazımdır?
- Bunu hamıdan yaxşı Robert Prosineçki bilir.

- Bakı Olimpiya stadionunda oynamaq sizi qorxutmur?
- Belə bir stadionda ilk dəfə meydana çıxmaq oyunun məsuliyyətini və ciddiyətini daha da artırır. Olimpiya stadionunda oynamaq çox xoş olacaq. Əksinə, bu arenada oynamaq bizim xeyrimizə işləyə bilər. Çünki stadiona daha çox azarkeş toplaşacaq. Onlar komandanı qələbəyə səsləyəcəklər.

- Yəqin ki, son turda "Xəzər Lənkəran" üzərində 6:0 hesablı qələbə qazandığınızdan siz bu oyuna daha böyük ruh yüksəkliyi ilə çıxacaqsınız?
- Bizə həmin görüşdə üç xal qazanmaq çox vacib idi. Oyunu yüksək səviyyədə keçirdik. Futbolda belə nəticələr çox olur.

- Məhz bu hesabla qalib gələcəyinizi gözləyirdiniz?
- Biz sadəcə, öz oyunumuzu göstərdik. Amma şübhəsiz ki, altı cavabsız qol vuracağımızı gözləmirdik və buna sevinməmək olmur. Lakin bir daha qeyd edirəm ki, biz oyuna bu qədər qol vurmaq üçün yox, qalib gəlmək üçün çıxmışdıq.