Robert Prosineçki: Sabah müsbət nəticə qazanacağımıza inanıram

Azərbaycan yığmasının baş məşqçisi Robert Prosineçki AÇ-2016-nın seçmə mərhələsi çərçivəsində keçiriləcək İtaliya ilə oyun öncəsi fikirlərini açıqlayıb. Azerisport.az xəbər verir ki, xorvatiyalı mütəxəssis bu gün baş tutan mətbuat konfransında öncə bunları söyləyb:

- Komandamız artıq beş gündür bir yerdədir. Məşqlərdən, oyuna hazırlıqdan razıyam. Həmişəki kimi hazırlaşmışıq. Sabah çətin oyun olacağını bilirik. İtaliya güclü komandadır, qrupun lideridir, dördqat dünya çempionudur. Son oyunların ardından futbolçularımızda özünəinam hissi artıb. Bunu hər məşqdə hiss etmək olur. İnanıram ki, sabahkı oyunda da müsbət nəticə qazana biləcəyik.

- Daha çox yaxşı oyun gözləyirsiniz, ya yaxşı nəticə?
- Mənə həm yaxşı oyun, həm də nəticə lazımdır. Xorvatlar da Bakıda qələbə qazanacaqlarını düşünürdülər, amma hər şey əksinə oldu. İtaliya yığmasının da öz oyununu göstərə bilməməsi üçün əlimizdən gələni edəcəyik.

- Siz hər dəfə start heyətini açıqlayırdınız...
- Bəli, açıqlayırdım. Amma bu dəfə bacarmayacağam. Çünki iki futbolçumuzun yüngül zədəsi var. Mən onların son məşqlərdə özlərini necə göstərəcəyinə baxmalıyam. Əks halda indi start heyətimiz hazır olardı. Hər şey qaydasında olsa, meydana Kamran, Bədavi, Rəşad, Arif, Qara, Eddi, Rahid, Dmitri, Ruslan və Əfran çıxacaq.

- Sizinlə Berti Foqtsun komandası arasında hansı fərqlər var?
- Keçmişi xatırlamaq, komandaları müqayisə etmək istəmirəm. Qısa müddət ərzində Azərbaycan yığmasında özünəinam hissini geri qaytarmışıq. Komanda indi daha yaxşı futbol sərgiləyir. Dörd oyundur uduzmuruq, onlardan ikisini səfərdə keçirmişik. Komanda özünü yaxşı tərəfdən göstərməyi bacarır. Hər bir baş məşqçinin öz fəlsəfəsi olur. Görürəm ki, futbolçular məni başa düşürlər və istədiyim kimi oynamağa çalışırlar. Yeri gəlmişkən, eşitdiyimə görə, oyuna 40 min bilet satılıb. Bu, ciddi göstəricidir.