Fuad Bayramov: Avstriya o qədər də güclü deyil, onlara qalib gələ bilərik

Azərbaycanın gənclərdən ibarət yığma komandasının yarımmüdafiəçisi Fuad Bayramov AÇ-2017-nin seçmə mərhələsi çərçivəsində Avstriyaya qarşı keçirəcəkləri səfər oyunu öncəsi azerisport.az saytının suallarını cavablandırıb.

- U-21 yığmamızı Avstriya ilə oyuna hazır saymaq olar?
- Heyətdə zədəli futbolçularımızın olmasına baxmayaraq, oyuna hazır olduğumuzu demək olar.

- Hədəf qələbə qazanmaqdır, ya bir xal qazanmaq?
- Bakıda keçirilən oyunda biz bu komandaya 0:2 hesabıyla uduzmuşduq. Həmin oyunun videoyazısına bir daha baxmışıq. Sizi əmin edirəm ki, bu komanda elə də güclü deyil. Ona görə də bizim qələbə qazanmağımızın mümkün olmadığını demək düzgün olmazdı. Komanda üzvləri uğur qazanacağımıza inanır.

- Deməli, Bakıdakı məğlubiyyəti unutdurmağa çalışacaqsınız?
- Çalışacağıq ki, həmin uğursuzluğu unutduraq. Bir daha qeyd edirəm ki, bu komandadan xal almaq olar. Avstriyadan ən azı bir xalla qayıda bilərik.

- Bakıdakı oyunda Mixail Qreqoriçi dayandıra bilməmişdiniz və iki qol vurmuşdu. Bu dəfə onu necə saxlamağı düşünürsünüz?
- Siz 11 nömrəli futbolçunu deyirsiniz? Bəli, o çox yaxşı hücumçudur. Rəqib də oyununu məhz onun üzərində qurur. Allah eləsin ki, biz bu dəfə onun qol vurmasına imkan verməyək.

- Komandamızın bu oyundakı şanslarını necə qiymətləndirərdiniz?
- Təxminən 40-ın 60-a.

- Yığmamızın qrupdakı şansları barədə nə düşünürsünüz?
- Biz çox çətin qrupa düşmüşük. Burada bütün rəqiblər digərinə qalib gələcək gücdədir. Biz də mümkün qədər yaxşı nəticə göstərməyə çalışacağıq.

- Rəqiblər sizə yuxarıdan aşağı baxmırlar?
- Düşünmürəm. Düzünü deyim ki, mən belə şey hiss etməmişəm.