Emilyano Vila: Millinin baş məşqçisi hazırda İnterdə oynadığımı bilir
"İnter"in albaniyalı yarımmüdafiəçisi Emilyano Vilanın azerisport.az saytına müsahibəsi
- Öncə sizin "İnter"ə keçidinizdən danışaq. Necə oldu ki, bu kluba gəldiniz?
- Bir neçə klubdan təklif var idi. Onları diqqətlə analiz etdikdən sonra "İnter" variantını seçdim. Çox yaxşı komandadır. Heyətdə çoxlu güclü futbolçu var. Avropa Liqasında da uğurlu çıxış etdilər. Bütün bunlar diqqətimi çəkdi və "İnter"də oynamaq arzusuna düşdüm. Ümid edirəm ki, "İnter"ə uzun müddət çıxış edəcəyəm və komandaya faydalı olacağam.
- "İnter"də "Qarabağ"a qarşı oyunda debüt etdiniz. Sizin üçün uğursuz bitən bu görüşlə bağlı nə deyə bilərsiniz?
- 64 dəqiqə meydanda oldum. Fikrimcə, debütüm uğurlu alındı. Komandada bütün qərarları baş məşqçi qəbul edir. Mənim də necə oynadığımı o yaxşı bilir. Mən həmişə komandama kömək etməyə hazıram.
- "İnter"in qapısına təyin olunan penalti çox müzakirə edildi...
- Bu barədə heç nə deyə bilmərəm. Çünki mən hakim deyiləm.
- "Qarabağ"da həmyerliniz Ansi Aqolli çıxış edir. Yəqin ki, yaxşı münasibətiniz var...
- Bəli, Aqolli mənim dostumdur. Mən Bakıya təzə gələndə onun mənə çox köməyi dəydi. O, mənə dedi ki, "İnter" böyük komandadır, həmişə çempionluq uğrunda mübarizə aparır.
- Xorvatiya və Yunanıstanda da legioner həyatı yaşamısınız. Azərbaycan çempionatı həmin birinciliklərdən nə ilə fərqlənir? Çətin deyil?
- Xeyr, mən legioner həyatı yaşamağa alışmışam. Fikrimcə, çətin olmayacaq. "İnter"in əsas heyət oyunçularından olmaq istəyirəm. Ümid edirəm ki, alınacaq.
- Albaniya yığmasının baş məşqçisi sizin "İnter"ə keçidinizdən xəbərdardır?
- Son dövrlər yığma komandaya dəvət almıram. Əlbəttə, millidə oynamağı çox istərdim. Baş məşqçi məni yaxşı tanıyır. O da mənim "İnter"ə keçidimdən xəbərdardır. Çünki Albaniya mətbuatı həmin keçidi ətraflı işıqlandırmışdı. Amma ondan sonra aramızda söhbət olmayıb.
- Azərbaycan çempionatı barədə fikirlərinizi də bilmək istərdik...
- "Qarabağ"la oyunda rəqibin nəyə qadir olduğunu gördük. "Qəbələ"yə qalib gəlmişdik. Bütövlükdə, bütün klublar güclüdür. Biz hər bir oyunda maksimum diqqətli olmalıyıq. Çempionatın səviyyəsi də kifayət qədər yüksəkdir. Bütün komandalar bir-birindən xal ala bilərlər.
