İtaliya və Bolqarıstan ilə oyunlara 0 qolla
Azerisport.az sizi ənənəvi olaraq, Azərbaycan yığmasının üzvlərinin AÇ-2016-nın seçmə mərhələsi çərçivəsində İtaliya (10 oktyabr) və Bolqarıstanla (13 oktyabr) oyunlar öncəsi klublarının heyətindəki göstəriciləri ilə tanış edir.
Qapıçılar
Kamran Ağayev Türkiyə PTT 1-ci liqasının 7-ci turu çərçivəsində "Karşıyaka"nın heyətində "Alanyaspor"a qarşı oyunda iki qol buraxıb (2:2). 90 dəqiqəq meydanda olan millimizin əsas qolkiperi epizodların birində penalti qaytarmaqla diqqət mərkəzinə düşsə də, rəqib məhz təkrar zərbə ilə hesaba tarazlıq gətirib.
Aqil Məmmədovla ("Neftçi") Anar Nəzirovun ("Zirə") komandaları Topaz Premyer Liqasının 7-ci turunda bir-biri ilə qarşılaşıb. Onların duelindən Nəzirov qalib ayrılıb. Belə ki, Aqilin 2 qol buraxdığı oyunda Anarın komandası 2:0 hesablı qələbəyə sevinib. Hər iki futbolçu 90 dəqiqə meydanda olub.
Müdafiəçilər
Tərlan Quliyev "Kəpəz"in heyətində "Sumqayıt" üzərində qələbədə (3:1) pay sahibi olub.
"Qarabağ"ın futbolçuları - Maksim Medvedev, Bədavi Hüseynov və Rəşad Sadıqov "İnter"ə qarşı səfər matçının (2:0) iştirak ərizəsində yer almayıb. Əvəzində onlar həmin oyundan iki gün öncə baş tutan Belçika "Anderlext"i ilə ev matçında (1:0) 90 dəqiqə mübarizə aparıblar.
Arif Daşdəmirov, Ruslan Abışov və Məhəmməd Mirzəbəyov "Qəbələ"nin "Xəzər Lənkəran" üzərindəki qələbəsində (6:0) pay sahibi olublar. Ariflə Ruslandan fərqli, Məhəmməd qarşılaşmanın 46-cı dəqiqəsindən etibarən meydana çıxıb.
Pavel Paşayev Zaporojye "Metallurq"unun heyətində Ukrayna çempionatı çərçivəsində Donetsk "Olimpik"i ilə ev oyununda darmadağına üzülüb. 90 dəqiqə meydanda olan millimizin üzvü sarı vərəqə almaqla diqqət mərkəzinə düşüb.
Yarımmüdafiəçilər
Rəşad Sadiqov "Qəbələ"nin "Xəzər Lənkəran" üzərindəki qələbəsini ehtiyat oyunçular skamyasından izləyib.
Elvin Məmmədovla Əfran İsmayılov "İnter"lə qarşılaşmada 90 dəqiqə meydanda olublar. Qara Qarayevin adı isə bu görüşün iştirak ərizəsində yer almayıb.
Dmitri Nazarov Almaniya ikinci Bundesliqasının 10-cu turu çərçivəsində "Karlsrue"nin heyətində "Frayburq"la qarşılaşmada (1:1) 81 dəqiqə meydanda olub.
Toğrul Erat isə ikinci Bundesliqanın son turunda "Fortuna"nın əsas komandasının "Kayzerslautern"ə böyük hesabla uduzduğu görüşü (0:3) ehtiyat oyunçular skamyasından izləyib. Əvəzində o, bu klubun U-23 komandasının heyətində "Verl"ə qarşı ev oyununda (1:4) 90 dəqiqə mübarizə aparıb.
Rahid Əmirquliyev "Xəzər Lənkəran"ın heyətində "Qəbələ"yə böyük hesabla uduzduqları göüşdə 90 dəqiqə meydanda olub.
Rəhman Hacıyev "Neftçi"nin "Zirə" ilə görüşündə 90 dəqiqə mübarizə aparıb.
Eddi İsrafilov İspaniya La Liqasının 7-ci turu çərçivəsində "Las Palmas"la ev oyununda (2:0) 69-cu dəqiqədən etibarən "Eybar"ın heyətində meydanda olub.
Hücumçular
Ruslan Qurbanov "Neftçi"nin "Zirə"yə qarşı oyununda 64 dəqiqə meydanda olub.
Elnur Cəfərov da "Xəzər Lənkəran"ın Qəbələdəki darmadağınında 90 dəqiqə mübarizə aparıb.
