Elvin Camalov: Avroliqada da oynamağa hazıram

"Qəbələ"nin yarımmüdafiəçisi Elvin Camalovun azerisport.az saytına müsahibəsi

- "Xəzər Lənkəran"a qarşı keçirdiyiniz son çempionat oyunu ilə bağlı nə deyə bilərsiniz?
- Bu görüşün yağışda keçəcəyini gözləmirdik. Buna baxmayaraq, öz oyunumuzu sərgiləməyə çalışdıq. Xoşbəxtlikdən möhtəşəm qələbə qazandıq.

- Belə böyük hesabla qələbə qazanacağınızı gözləyirdiniz?
- Əlbəttə, yox. Futbolda hər şey ola bilər. Biz baş məşqçinin bütün tapşırıqlarını yerinə yetirməyə çalışdıq. O, bizə öz futbolumuzu sərgiləməyə çalışdıq. Belə olan halda qollar da olacaq.

- Hesab göstərdi ki, rəqibə qarşı çox acımasız oldunuz. Rəqib qarşınıza çox qol vurmaq tapşırığı qoymuşdunuz?
- Biz öz sistemimizlə oynamağa çalışdıq. Qollar da gəldi. Bu hesab sərgilədiyimiz oyuna uyğun oldu.

- "Qəbələ" çempionluq uğrunda mübarizə aparmağa tam hazırdır?
- Öncədən nəsə demək istəmirəm. Qarşıda hələ çox oyunumuz var. Bizi maraqlı və çətin oyunlar gözləyir. Çalışacağıq ki, daha yaxşı oynayaq və nəticə qazanaq.

- Avropa Liqasında oynamırsınız, ancaq çempionat görüşlərində meydana çıxırsınız. Siz özünüzü ehtiyat oyunçu hesab etmirsiniz?
- Bizim komandada ehtiyat və ya əsas heyət oyunçusu anlayışı yoxdur. Avroliqada da oynamağa hazıram. Sadəcə, baş məşqçinin şans verməsini gözləyirəm. Gənc futbolçuyam. Məşq edirəm, özümü yaxşı tərəfdən göstərməyə çalışıram. Allah eləsin ki, Roman Qriqorçuk mənə də özümü göstərməyə şans versin.