Bədavi Hüseynov: Anderlext üzərindəki qələbəni unudub, növbəti görüşlərə hazırlaşmalıyıq
"Qarabağ"ın müdafiəçisi Bədavi Hüseynovun azerisport.az saytına müsahibəsi
- "İnter"lə son çempionat oyunu barədə nə deyə bilərsiniz?
- "İnter"in əsas rəqiblərimizdən biri olduğunu başa düşürdük. Son dövrlər bu komanda çox yaxşı oyun sərgiləyirdi. Çətin olacağını bilirdik. Elə də oldu. "İnter"in də bizə qol vurmaq şansları var idi. Amma xoşbəxtlikdən biz qalib gələn tərəf olduq.
- Yəqin ki, bu matçda ən yaddaqalan epizodun "İnter"in qapısına təyin olunan penalti olduğunu etiraf edərsiniz...
- "İnter"in qapıçısı Georgi Lomayanın topa oynadığını hamı gördü. Amma hakimlər də hərdən səhv edə bilərlər. Bu, normaldır. Belə epizodlarda feyr-pleyə əməl etmək lazımdır.
- Belçika "Anderlext"i ilə Avroliqa oyunundan sonra yorğunluq yox idi?
- Bəli. Belçikalılarla oyun bizim üçün çox ağır oldu. "Anderlext" çox güclü komandadır.
- Amma komandanız hər iki oyunda qalib gələ bildi...
- "Anderlext"in güclü və zəif cəhətlərini yaxşı bilirdik. Baş məşqçi onların oyununu yaxşı analiz etmişdi. Ona görə də Qurban Qurbanovun bütün tapşırıqlarını ən yaxşı şəkildə yerinə yetirməyə çalışırdıq. Sonda da istəyimizə nail ola bildik.
- Riçard Almeydadan belə gözəl qol gözləyirdiniz?
- O, matçı yüksək səviyyədə keçirdi. Ona görə də Riçardın belə gözəl qol vurmasına təəccüblənmədim. O, "Qarabağ" üçün çox vacib futbolçudur.
- "Anderlext"lə oyunda əvvəlki görüşlərdəki qədər azarkeş yox idi. Sizcə, bunun səbəbi nə idi?
- Bunun nə ilə bağlı olduğunu dəqiq deyə bilmərəm. Ola bilsin ki, bilet satışı ilə, ola bilsin ki, matçın gec saatda başlaması ilə. Biz təbii ki, tribunalara daha çox azarkeşin gəlməsini istəyirik. "Anderlext"lə oyunda bizi dəstəkləməyə gələn azarkeşlərin də hamısına təşəkkürümü bildirirəm.
- "Qarabağ" qrupunda ikinci yerdə gedir. Yəqin ki, siz bundan razısınız. Mövqeyinizi sona qədər qoruya biləcəksiniz?
- Biz bununla razılaşa bilmərik. Cəmi iki oyun keçirmişik. Bizi hələ daha ağır oyunlar gözləyir. "Anderlext"lə görüşü unudub, qarşıdakı oyunlara hazırlaşmalıyıq.
- Növbəti rəqibiniz Fransa "Monako"sudur. Bu görüşdə xal qazana biləcəksiniz?
- "Monako"nun xüsusi təqdimata ehtiyacı yoxdur. Bu klubda ulduz futbolçular çıxış edir. Onlar "Tottenhem"lə heç-heçə etmişdilər. Bizi də çox çətin oyun gözləyir.
