Vəli Qasımov: Biz Zirədən məğlub qayıdacağımızı gözləmirdik
"Neftçi"nin idman direktoru Vəli Qasımov Topaz Premyer Liqasının 7-ci turu çərçivəsində "Zirə"yə qarşı keçirdikləri oyundan (0:2) sonra azerisport.az saytının suallarını cavablandırıb.
- Çempionatın debütantına məğlubiyyəti necə qarşıladınız?
- Biz belə məğlubiyyəti gözləmirdik. Səfərdən qələbə ilə qayıdacağımızı düşünürdük.
- Yəqin ki, belə əminlik "Qarabağ"la səfər oyunundakı (1:1) inamlı çıxışdan irəli gəlirdi...
- Belə çıxır ki, futbolçularımız "Zirə" ilə oyuna lazımi qaydada köklənə bilməmişdilər.
- Üç xal səndən öndə olan komanda ilə oyuna necə lazımi qaydada köklənməmək olar?
- Biz əslində oyuna çox yaxşı başlamışdıq. Oyuna nəzarət edirdik. Amma kiçik bir səhv qolla nəticələndi. Sonra qırmızı vərəqə və məğlubiyyət qaçılmaz oldu.
- Oyundan sonra baş məşqçi Samir Əliyev qırmızı vərəqə alaraq komandanı pis vəziyyətdə qoyan Fəhmin Muradbəylinin cəzalanacağını söylədi. Artıq ona hansı cəzanı verəcəyinizi müəyyənləşdirmisiniz?
- O, gənclərdən ibarət yığmamızın heyətində təlim-məşq toplanışına yollandığından söhbətimiz olmadı. Çox xoşagəlməz məqamdır. Amma oyunu analiz etmişik. Biz gördük ki, həmin ana qədər futbolçumuza qarşı çox kobudluq edilsə də, hakim buna reaksiya göstərməyib. Qırmızı vərəqə haqlı idi. Futbolçu da öz səhvini etiraf edib. Amma digər tərəfdən bunun yolverilməz olduğunu da başa düşürük.
- Bəs bütövlükdə hakimliklə bağlı nə deyə bilərsiniz? Məsələn, ikinci hissədə Ruslan Qurbanov ona qarşı qayda pozuntusu olduğunu bildirirdi və penalti tələb edirdi...
- Bu, birinci hal deyil. Gah penalti verirlər, gah vermirlər. Son dövrlər çox kobud səhvlərə yol verirlər. Bu, əlbəttə, anormal haldır.
- "Neftçi" "Qarabağ", "Qəbələ", "Zirə" və "İnter"dən ayrı düşür. Bu, sizi narahat etmir?
- Hələ mövsümün əvvəlində bilirdik ki, tam hazır deyilik. Bizim üçün hər şey yeni başlayır. Biz hələ komanda formalaşdırırıq. Sabitlik çatışmır. Komandanı başa düşmək lazımdır. Gənc oyunçular hələ güclü rəqiblərə qarşı yaxşı hazırlaşa bilmirlər. Bunun üzərində çalışırıq.
