Rahid Əmirquliyev: İtaliyaya uduzmamağa, Bolqarıstana qalib gəlməyə çalışacağıq
Azərbaycan yığmasının və "Xəzər Lənkəran"ın yarımmüdafiəçisi Rahid Əmirquliyevin azerisport.az saytına müsahibəsi
- Son turdakı "Zirə"yə məğlubiyyətdən sonra "Qəbələ" ilə görüşə necə hazırlaşmısınız?
- Yaxşı hazırlaşmışıq. Çətin olacağını bilirik. Rəqib bu mövsüm çempionluğa köklənib. "Zirə"yə məğlub olmağımıza baxmayaraq, komandamızda ab-hava yaxşıdır. Çünki uduzsaq da, yaxşı futbol sərgiləmişdik. Bircə səhvə yol verdik ki, o da qolla nəticələndi. Təəssüf ki, hər oyun öncəsi heyətimizdəki problemlərdən danışmalı oluruq.
- "Qəbələ"yə də qarşı Orxan Əliyevsiz, Rasim Ramaldanovsuz oynayacaqsınız...
- Bu, bizim üçün cidi problemdir. Çünki heyətimizdə onsuz da çox futbolçu yoxdur. Bu üzdən hansısa dəyişiklik etmək də problemə çevrilir. Bütün bunlara baxmayaraq, "Qəbələ"yə qarş yaxşı oynamağa, öz futbolumuzu sərgiləməyə çalışacağıq.
- Sizi hansı nəticə qane edəcək?
- Ən azı uduzmamalıyıq.
- Şans çox azdır. Razısınız?
- Əlbəttə. "Qəbələ" favoritdir.
- Rusiya "Krasnodar"ı ilə Avroliqa matçı "Qəbələ"nin xeyli güc itirməsinə səbəb oldu. Bu, sizə hansısa üstünlük qazandıra bilər?
- Bunun bizə hansısa üstünlük qazandırdığını düşünmürəm. Qəbələ klubunun heyətində kifayət qədər futbolçu var. Bu üzdən də onların yorğunluqdan əziyyət çəkməsi mümkün deyil.
- Robert Prosineçkinin yığmaya çağırdığı futbolçular arasında sizin də adınız var. Öz oyununuzdan razısınız?
- (gülür) Əsas odur ki, kənardan baxanlar razı olsunlar. Yaxşı formada olmağa çalışıram. Həm də mövsüm hələ yeni başlayıb. Nəticə çıxarmaq tezdir. Bütövlükdə mövsümün startını mənim üçün uğurlu saymaq olar. Amma mən daha yaxşı oynamaq istəyirəm.
- İtaliya ilə oyun öncəsi həyəcan var? Həm də bu oyun Bakı Olimpiya Stadionunda keçiriləcək...
- Xüsusi həyəcan yoxdur. Amma bu oyunu düşünməyə başlamışam. Yeni stadion, böyük rəqib... Azərbaycan yığması artıq dörd oyundur rəsmi qarşılaşmalarda uduzmur. Qarşıda daha iki seçmə mərhələ oyunu var. İtaliyaya uduzmamağa, Bolqarıstana qalib gəlməyə çalışacağıq. Fikrimcə, biz bolqarları səfərdə məğlub edəcək gücdəyik.
