Fakundo Pereyra: Qəbələ üçün hələ heç nə itirilməyib

"Qəbələ"nin hücumçusu Fakundo Pereyra Avropa Liqasının qrup mərhələsinin ikinci turu çərçivəsində Rusiyanın "Krasnodar" klubuna qarşı keçirdikləri səfər oyunundan (1:2) sonra azerisport.az saytının suallarını cavablandırıb.

- Matçla bağlı nə deyə bilərsiniz?
- Demək olar ki, bərabər səviyyəli oyun oldu. Tərəflər növbə ilə üstünlüyə yiyələnirdi. Ona görə də matçın gedişatını öncədən müəyyənləşdirmək çətin idi. Hər iki komanda qalib gələ bilərdi. Təəssüf ki, buna biz yox, rəqib nail oldu.

- Hakim hesab 1:1 olarkən Dodonun vurduğu qolu qeydə almadı. Sizcə, ofsayd var idi?
- Oradan ofsayddan heç bir əlamət yox idi. Biz bu oyunda daha artığına layiq idik. Təəssüf ki, xalsız qaldıq. Bu, bizi çox məyus edir.

- "Krasnodar"ın baş məşqçisi deyib ki, "Qəbələ"nin müdafiəsində boşluqlar var idi. Bu, nə ilə bağlıydı?
- Ola bilsin ki, o, belə düşünür. "Krasnodar"ın da müdafiəsində boşluqlar olurdu. Hər halda bu, onun şəxsi fikridir. Amma "Krasnodar"ın baş məşqçisinin elə düşünməsi o demək deyil ki, biz onun komandasına qarşı zəif oynadıq. Əksinə, biz çox yaxşı mübarizə apardıq. Müdafiə xəttimiz də yaxşı çıxış etdi.

- Birinci hissədə təkcə müdafiədə yox, hücumda da oyununuz yaxşı alınmırdı. Niyə?
- Biz fasiləyə qədər tam köklənə bilməmişdik. Amma ikinci hissədə bunun öhdəsindən gəldik. İkinci hissədə 20-25 dəqiqə ümumiyyətlə bizim üstünlüyümüz şəraitində keçdi. Çoxlu qol vəziyyətimiz də var idi. Təəssüf ki, onlardan yararlana bilmədik. Nə etmək olar? Biz buraxdığımız səhvlər üzərində çalışmalı və onları vaxtında aradan qaldırmalıyıq.

- Bir hücumçu kimi qol vəziyyətlərindən yaxşı yararlana bilməməyinizi nə ilə əlaqələndirə bilərsiniz?
- Hücumları istədiyimiz kimi yekunlaşdıra bilmirdik. Biz öz üzərimizdə çalışmalıyıq. Hələ heç nə itirilməyib. Qarşıdakı oyunlara hazırlaşmalıyıq. Hər şey həmin oyunları necə keçirməyimizdən asılıdır.