Kamal Quliyev: Qarabağ və Qəbələ 3 xal qazana bilər

Azərbaycan yığmasının sabiq futbolçusu Kamal Quliyev "Qarabağ"la "Qəbələ"nin Avropa Liqasının qrup mərhələsinin ikinci turundakı şanslarını dəyərləndirib. Azerisport.az saytına açıqlamasında o, bunları söyləyib:

"Qarabağ" Belçika "Anderlext"inə qalib gələcək gücdədir. Qurban Qurbanovun komandası hücum futbolu sərgiləyə bilər. İnanıram ki, "Qarabağ" doğma meydanda 3 xal qazana biləcək. "Qəbələ"yə gəlincə, onlar Rusiya "Krasnodar"ı ilə səfərdə oynayacaqlar. Amma bu komandanın da qələbə qazanmaq şansı var. "Krasnodar" "Panatiaikos" deyil. Yəni "Qəbələ" "Panatinaikos"a səfərdə iki qol vura bilmişdisə, deməli, Rusiya klubu ilə görüşdə də fərqlənə bilər".

Quliyev klublarımızın qrupdan çıxmaq şansları barədə də danışıb: "Əlbəttə, buna nail olmaq çox çətin görünür. "Qarabağ" qrup mərhələsinə məğlubiyyətlə başladı. Lakin yenə də hər şey klublarımızın öz əlindədir. Belə güclü rəqiblərlə oyunlarda 1-2 qol vəziyyəti olur ki, onlardan da maksimum yararlanmağımız lazımdır. "Qəbələ"nin artıq bir xalı var. Amma qrupdan çıxmaq üçün daha yaxşı nəticələr qazanması lazımdır. Hər iki komandamıza uğurlar arzulayıram. Onların çıxışı Azərbaycan futbolunun səviyyəsini Avropaya, dünyaya göstərir. Allah eləsin ki, ölkəmizi avrokuboklarda layiqincə təmsil etsinlər".