Ruslan Qurbanov: Üzərimdə daha çox çalışmalıyam ki, baş məşqçi elə söz deməsin

"Neftçi"nin forvardı Ruslan Qurbanovun azerisport.az saytına müsahibəsi

- "Qarabağ"la heç-heçəni (1:1) necə şərh edə bilərsiniz?
- Oyun bizim üçün yaxşı alındı. Fikrimcə, oyuna gələn azarkeşlər də sərgilənən futboldan razı qaldılar.

- Araz Abdullayev zədələnən zaman onu siz əvəz etdiniz. Yəqin ki, meydana elə erkən çıxacağınızı gözləmirdiniz...
- Bəli, ehtiyatda qaldığıma görə artıq 6-cı dəqiqədə meydana çıxacağımı düşünmürdüm. Amma Araz zədələndiyi üçün onu əvəzlədim və komandamın uğur qazanması üçün mübarizə apardım. Araza tezliklə sağalmağı və sıraya dönməyi arzulayıram.

- Sizin də qol vurmaq şansınız vardı. Buna nə mane oldu ki?
- Bizim qol vəziyyətlərimiz oldu. Amma yenə də ustalıq səviyyəsi sözünü dedi. Məşqlərdə daha çox çalışmaq lazımdır ki, belə qol vəziyyətlərindən də maksimum yararlanaq.

- Samir Əliyev sizi ikinci hissədə əvəzlədi...
- Əvəzlənməyimi baş məşqçidən özüm xahiş etdim. Çünki köhnə zədəm özünü hiss etdirdi.

- Qapınıza təyin olunan penalti böyük rezonansa səbəb oldu. Sizin həmin epizodla bağlı fikriniz necədir?
- Mən bu barədə çox danışmaq istəməzdim. Epizoda baxdım. Onu deyə bilərəm ki, belə oyunlarda bu cür penatilər təyin olunmur. "Qarabağ" heç nədən qol vəziyyəti yarada bilən komandadır. Ona görə də mənə elə gəlir ki, hakim cərimə zərbəsini təyin etməməliydi. Artıq hər şey keçmişdə qalıb. İki xal itirdiyimiz üçün təəssüflənirik. Amma çempionat davam edir.

- Matçdan sonrakı mətbuat konfransında Samir Əliyev bildirdi ki, o, Jayronun əvəzində Rahil Məmmədova, Ruslan Qurbanovun yerində isə Fəhmin Muradbəylinin oynamasına üstünlük verər...
- Samir Əliyev baş məşqçidir və kimin də oynayacağına o qərar verir. O, belə deyibsə, deməli, mənə daha çox çalışmaq və oynamağa hazır olduğumu göstərməyim lazımdır. Son sözü həmişə baş məşqçi deyir. Bir daha qeyd edirəm ki, belə söhbətlərin olmaması üçün öz üzərimdə daha çox çalışmağıma ehtiyac var.