Qurban Qurbanov: Mənim planlaşdırdığım kimi oynasaq, qalib gələ bilərik

"Qarabağ"ın baş məşqçisi Qurban Qurbanov Avropa Liqasının qrup mərhələsi çərçivəsində Belçika "Anderlext"inə qarşı oyun öncəsi fikirlərini bölüşüb. Azerisport.az xəbər verir ki, Ağdam klubunun çalışdırıcısı öncə bunları söyləyib:

"Rəqibə sürətdə uduzmamağa çalışmalıyıq. Əks halda yaxşı futbol oynamaqda çətinliklə üzləşəcəyik. Futbolçularıma inanıram və komandamdan yaxşı futbol gözləyirəm. "Anderlext" kimi klubun Bakıya gəlməsi Azərbaycan futboluna ancaq fayda verəcək. Özümüzü yaxşı tərəfdən göstərməyə çalışmalıyıq".

"Çumbinyo bu oyunda meydana çıxmayacaq. Çünki oyun təcrübəsi azdır. Sabahkı oyunda isə bizə uğur qazanmaq lazımdır. Yaxşı oyun sərgiləməyimizi istəyirəm. Rəqibin heyətində Stefano Okaka kimi fiziki cəhətdən çox güclü mərkəz hücumçusu var".

Qurbanov bəyan edib ki, komandasının futbolçuları arasında heç bir problem yoxdur: "Futbolçularımızla bağlı heç bir problem yoxdur. Komandada hər şey normaldır. "Qarabağ"a psixoloq lazım olduğunu düşünmürəm. Nə vaxt lazımdırsa, futbolçularla söhbət edirəm. Mən onlara güvənirəm, onlar da mənə".

"Sabah bizə 5-6 futbolçu ilə hücum emtək lazımdır. Kollektiv futbol sərgiləməliyik. Yalnız oyundan sonra demək olar ki, mümkün heç-heçə bizim üçün nə dərəcədə sərfəli nəticədir. Mən planlaşdırdığım kimi oynasaq, nəinki bir xal, hətta üç xal da qazanarıq".

Qurbanov İngiltərə "Tottenhem"inə qarşı keçirdikləri oyunu da (1:3) xatırlayıb: "Tottenhem" çox güclüdür. Biz hesabı açsaq da, üç qol buraxdıq. Bizimlə oyundan sonra onlar "Mançester Siti"yə dörd qol vurdular".