Vaqif Cavadov: Qəbələnin hədəfi Krasnodardan 3 xalla qayıtmaqdır
"Qəbələ"nin hücumçusu Vaqif Cavadov Avropa Liqasının qrup mərhələsi çərçivəsində Rusiya "Krasnodar"ına qarşı səfər oyunu öncəsi azerisport.az saytının suallarını cavablandırıb.
- "Krasnodar"la oyun üçün hədəfiniz nədən ibarətdir?
- Mən həmişə real danışmışam. Nə bacarırıqsa, onu da göstərməyə çalışacağıq. Qələbə qazanmaq istəyirik. Başa düşürük ki, "Krasnodar"la oynaya bilərik. Biz həmişə Rusiya və Ukrayna klublarına qarşı yaxşı oynamışıq və nəticələr qazanmışıq. Ümid edirəm ki, sabah da öz istəyimizə çatacağıq.
- "Qəbələ"nin Rusiyada qələbə qazanması sensasiya hesab oluna bilər?
- Xeyr. "Qəbələ"nin Avroliqanın qrup mərhələsinə vəsiqə qazanacağına da şübhə edənlər çox idi. Hamı təkcə "Qarabağ"ın qrup mərhələsinə çıxacağını düşünürdü. Amma komanda böyük uğura imza ataraq, "Qarabağ"la birgə qrupda oynamaq şansı əldə etdi. "Krasnodar" Dortmund "Borussiya"sı deyil. Amma Rusiya klubu da zəif komanda sayıla bilməz.
- "Krasnodar" son dövrlər uğursuz çıxış edir. Bu, sizin üçün üstünlük sayıla bilər?
- Ola bilər. Amma rəqib komandanın çoxlu güclü futbolçusu var. Onlar Rusiyada pis çıxış etmirlər.
- Rəqib düşərgə hansı futbolçunu xüsusi qeyd edə bilərsiniz?
- Fedor Smolov son dövrlər pis oynamır. Artıq yığmaya da dəvət olunur. Ari Joazinyo il Pavel Məmmədovu da unutmaq olmaz. Amma biz rəqibin yox, öz oyunumuzu düşünməliyik. "Qəbələ" öz oyununu sərgiləyə bilsə, bir qədər də bəxtimiz gətirsə, uğur qazana bilərik (gülür).
- "Qəbələ"nin hazırda tarixinin ən güclü heyətinə malik olduğunu demək olar?
- Bəli, yaxşı heyətimiz var, güclü rəqabət mövcuddur. Mən komandaya yenicə gəlmişəm. Ümid edirəm ki, mənim də faydam toxunacaq.
- Sizin start heyətdə meydana çıxacağınıza ümid etmək olar?
- Komandaya kömək etməyə hazıram. Amma heyəti baş məşqçi müəyyənləşdirir. İstənilən halda meydana çıxacaq hər bir futbolçumuza uğurlar arzulayıram. Hədəfimiz Krasnodardan üç xalla qayıtmaqdır.
