Toni Adams: Krasnodarla heç-heçədən çox razı qalaram, amma heç-heçə də fantastik nəticə olar
"Qəbələ"nin idman direktoru Toni Adams Avropa Liqasının qrup mərhələsi çərçivəsində Rusiya "Krasnodar"ına qarşı səfər oyunu öncəsi fikirlərini bölüşüb. Azerisport.az saytına açıqlamasında o, bunları söyləyib:
"İlk növbədə onu qeyd etmək istərdim ki, Avroliqanın qrup mərhələsində çıxış edən "Qəbələ"nin bir hissəsi olmaqdan qürur hissi duyuram. Bizi "Krasnodar"la çətin oyun gözləyir. Rəqibin heyətində çox yaxşı futbolçular var. Ona görə də biz bu səfər matçında maksimum güc sərf etməliyik".
İngiltərəli mütəxəssis rəqib komandanın əvvəlki oyunlarını izlədiyini bildirib: "Krasnodar"ın Dortmund "Borussiya"sına qarşı matçına baxmışam. Oyunumuzda balans yaratmalı, yaxşı çıxış etməli və qrup mərhələsində mübarizə aparmaqdan həzz almalıyıq. Bu, bizim üçün çox gözəl uğurdur. Bununla heç də arxayınlaşmaq lazım olduğunu demək istəmirəm. Sadəcə, bura qədər irəliləməyimizin yaxşı olduğunu demək istəyirəm. Bundan sonra da yeni uğurlar qazanmaq üçün yaxşı komandamız var".
Adamsın sözlərinə görə, o, bu qarşılaşmada qeydə alınacaq mümkün heç-heçədən razı qalacaq: "Bu qarşılaşmada qalib gəlməyimizə çox sevinərəm və razı qalaram. Amma fikrimcə, hətta heç-heçə də fantastik nəticə olacaq".
