Tural Axundov: Kəpəz belə oyunla indi ilk üçlükdə olmalı idi
"Kəpəz"in kapitanı Tural Axundov komandasının Topaz Premyer Liqasındakı çıxışını dəyərləndirib. Azerisport.az saytına açıqlamasında o, bunları söyləyib:
"Digər oyunlarda olduğu kimi, "İnter"ə qarşı son görüşdə də pis oynamadıq. Sadəcə, ələ düşən qol şanslarından yararlana bilmədik. Niyə belə olduğunu mən də bilmirəm. Nə deyə bilərəm ki? Bütün oyunları yaxşı keçiririk, oyun planında rəqiblərimizə uduzmuruq. Amma son nöqtəni qoymağı, qol vurmağı bacarmırıq. Bu mənada problemin təkcə hücumçularda olduğunu deməzdim. Artıq 6 tur geridə qalıb. Bütün oyunları yaxşı keçirmişik. Belə oyunla indi ən azı ilk üçlükdə qərarlaşmalıydıq. Amma hazırda 7-ci pillədəyik. İnanıram ki, komandamız növbəti turlarda qələbə qazanmağa başlayacaq. Hansı ki, buna ən azı sərgilədiymiz oyunla çox layiqik".
