Çingiz Abdullayev: Neftçi yüz faiz Qarabağla matçın qalibdir
"Neftçi"nin Müşahidə Şurasının sədri Çingiz Abdullayev Topaz Premyer Liqasının 6-cı turu çərçivəsində "Qarabağ"a qarşı keçirilmiş oyundan (1:1) sonra jurnalistlərin suallarını cavablandırıb. Azerisport.az xəbər verir ki, o, öncə bunları söyləyib:
- Mən 91-ci dəqiqədə "Neftçi"nin qapısına təyin olunmuş penaltini qəbul etmirəm. Biz bu gün qələbə qazandıq. Siz özünüz də hər şeyi gördünüz. Siz futbol jurnalistləri gördüklərinizi düzgün yazmalısınız. Şəxsən mən 100 faiz qələbə qazandığımızı düşünürəm. Oyundan sonra həmin penalti epizoduna da baxdım. Biz bu epizodla bağlı şikayət edəcəyik. Bu gün səfərdə oynayırdıq. Amma göstərdik ki, yaxşı futbol sərgiləyə bilərik. Matçdan öncə "Neftçi"nin şansının olmadığını deyirdilər. Hamı "Qarabağ"ın böyük klub olduğunu, Avropa Liqasında çıxış etdiyini danışırdı. Düzdür, yaxşı komandadır. Mənim də xoşuma gəlir. Amma "Neftçi" bu gün daha yaxşı oynadı.
- Sizə elə gəlmir ki, "Qarabağ" gücünü Avroliqada qarşılaşacağı "Anderlext"lə oyuna saxlayırdı?
- Mən buna inanmıram. Yaxşı yazıçı pis nəsə yazmaz. Messi oyunlara gücünə qənaət etmək üçün çıxmır ki. "Qarabağ" yaxşı oynadı, amma "Neftç" daha da yaxşı oynadı. Siz məgər bunu görmədiniz? Onda "Neftçi"nin yaxşı oynamadığını yazarsınız.
- Sizcə, hakimlik ümumiyyətlə zəif idi, yoxsa təkcə matçın sonundakı epizodda yanlışlıq olduğunu düşünürsünüz?
- Mən penalti epizodunu götürürəm. Bütün peşəkarların həmin məqama baxmasını istərdim. Sizin yazıları gözləyirəm. Doğru yazmaq istəyirsinizsə, onda "Neftçi"nin "Qarabağ"dan zəif olmadığını yazın. "Qarabağ" yeni stadion inşa etdirib. Mən də, Ağdamın yarıdan çoxu da həmişə bu komandaya azarkeşlik edir. Qoy "Qarabağ" hamıya qalib gəlsin, bircə "Neftçi"dən başqa. Mən bunu qəbul edə bilmərəm. Çox şadam ki, gənc futbolçularımız, məşqçimiz var. 2-3 il sonra komandamızın daha yaxşı nəticələr qazanacağına əminəm.
- Sizcə, "Neftçi" bu mövsüm çempion ola bilər?
- "Neftçi" həmişə birinci yer uğrunda oynamalıdır. Belə oyunla niyə də çempion olmamalıyıq? Əminəm ki, komandamız bundan sonra da belə yaxşı oynayacaq. Biz rəhbərliyə gələndən sonra çox dəyişiklik olub. O vaxt yığmamızın baş məçqçisi Robert Prosineçkidən xahiş etdik ki, milliyə komandamızdan heç olmasa bir futbolçu dəvət etsin. Amma indi yığmalara 9 futbolçu veririk. Bu barədə yazan yoxdur. Biz gələcəyi düşünürük, 18 yaşlı futbolçular üçün şərait yaratmağa çalışırıq. Kubokun finalında "Qarabağ"a uduzduğumuz oyunu yada salın. Həmin oyunla indiki matçı müqayisə edin. Lakin bunun əvəzində klubumuz haqda doğru olmayan məlumatlar yazırlar. Oktyabrın 1-də "Qarabağ"ı dəstəkləyəcəyəm. Avroliqada iki klubumuzun mübarizəni davam etdirməsinə biz də sevinirik. Çünki bu, ölkəmizin, ölkə futbolunun uğurudur. Buna necə sevinməmək olar?
