Ruslan Abışov: Qəbələnin əsas heyətində möhkəmlənmək istəyirəm

"Qəbələ"nin yarımmüdafiəçisi Ruslan Abışov Topaz Premyer Liqasının 6-cı turu çərçivəsində "Rəvan" üzərində qazandıqları qələbəni (3:0) şərh edib. Azerisport.az saytına açıqlamasında o, bunları söyləyib:

"Oyunun çətin keçəcəyini bilirdik. İndi istənilən komanda güclü rəqibdən xal ala bilir. Ona görə də biz oyuna ciddi hazırlaşmışdıq. "Rəvan" kimi komandalarla oyunlarda erkən qol vurmaq lazımdır ki, sonra rahat oynamaq mümkün olsun. Düzdür, ilk qol bir qədər gec gəldi. Ondan sonra daha sakit oynamağa başladıq. "Rəvan"ın isə müdafiə xəttində boşluqlar yaranmağa başladı. Bu, bizim üçün üstünlük yaradırdı. İkinci qoldan sonra matçın taleyi artıq həll olunmuşdu. Öz oyunuma gəlincə, hələ əvvəlki formamı bərpa etməyim üçün zamana ehtiyacım var. Məlum səbəblərdən bir müddət futbol oynamadım. Artıq bütün bunlar geridə qalıb. "Qəbələ"nən heyətində möhkəmlənmək və yığmamıza kömək etmək istəyirəm".