Dieqo Martins: İnter liderlərlə rəqabət apara bilər
"İnter"in yarımmüdafiəçisi Dieqo Martins Topaz Premyer Liqasının 6-cı turu çərçivəsində "Kəpəz"ə qarşı keçirdikləri oyundan (1:0) sonra azerisport.az saytının suallarını cavablandırıb.
- "Kəpəz" üzərində qazandığınız qələbə barədə nə deyə bilərsiniz?
- Qələbə qazansaq da, buna çox çətinliklə nail olduq. "Kəpəz" bizə qarşı ciddi oyun sərgilədi. Bu görüşdə nəticə qazanmaq bizim üçün vacib idi. Belə oyunlarda üç xal qazanmaq lazımdır.
- Matçdakı yeganə qolu siz vursanız da, həm də antiqəhrəman oldunuz. Çünki matçın sonlarında qırmızı vərəqə aldınız...
- (gülür) Birinci sarı vərəqəyə etirazım yoxdur. Hakim düzgün qərar qəbul etmişdi. Amma ikinci epizodda rəqib futbolçu mənim ayağıma zərbə endirdi. Ona görə də ikinci sarı vərəqə ilə razı deyiləm.
- Əksəriyyət bu mövsüm çempionluq uğrunda "Qarabağ"la "Qəbələ"nin mübarizə aparacağını düşünür. Amma sizin klub da inamlı çıxış edir. "İnter" bu cütlüklə rəqabət apara biləcək?
- Ümid edirəm ki, biz bu komandalarla çempionluq uğrunda mübarizə apara biləcəyik. Bunu çox istəyirəm. Komandamız yaxşı heyətə malikdir, bu klublarla rəqabət apara bilər. Elə bu yaxınlarda "Qəbələ"yə qalib gəldik. Bu, nədənsə xəbər verir.
- Bu, sizin cari mövsümdə vurduğunuz üçüncü qoldur. Debütant yarımmüdafiəçi üçün heç də pis nəticə deyil...
- Şadam ki, siz bunu qiymətləndirirsiniz. Bəli, bu mənim üçün yaxşı startdır. Bu tempdə də davam etmək istəyirəm. Amma əsas komandanın uğur qazanmasıdır.
- Bombardir olmaq şansınız var?
- Bu, mənim üçün çətin olacaq. Çünki yarımmüdafiəçiyəm. Amma belə hər bir futbolçu daha çox qol vurmaq istəyər.
- Uğurlu çıxışınız daha iddialı və imkanlı klubların diqqətini çəkməmiş deyil. Başqa klublara keçmək arzunuz var?
- İndi bu haqda danışmaq mənim üçün çətindir. Mən daim önümə baxıram və inkişaf etmək istəyirəm. Heç vaxt "heç vaxt" demirəm. Sabah nə olacağını deyə bilmərəm. Sabah daha güclü klubda oynamaq imkanı qazana bilsəm, buna ancaq sevinərəm.
