Aleksandr Quruli: AZAL-ın özünə gəlməsi üçün bir qələbə lazımdır
AZAL-ın yarımmüdafiəçisi Aleksandr Quruli Topaz Premyer Liqasının 5-ci turunda "İnter"ə qarşı keçirdikləri oyunda debüt etdi. Azerisport.az saytına açıqlamasında o, bu görüşü belə şərh edib:
"Oyuna yaxşı başlamışdıq. Topa nəzarət edirdik. "İnter" yaxşı komandadır. Lakin biz də pis oynamadıq. Sadəcə, hər məğlubiyyətdən sonra komandanın özünə gəlməsi çətin olur. "İnter" qol vurduqdan sonra biz daha yaxşı oynamağa çalışdıq. İkinci hissəyə ümumiyyətlə, tam fərqli başladıq. Bütövlükdə, yaxşı çıxış etsək də, sonda "İnter" güclü oldu. "İnter"də oynayan gürcü futbolçularla dostuq. Onların necə yaxşı oyunçu olduğunu hamı görür. Georgi Lomaya və Zurab Xizanişvili təcrübəli futbolçulardır. Azərbaycan çempionatı barədə hələ az məlumatım var. Özümə gəlincə, hələ yaxşı forma yığmağım lazımdır. Klubumuzun əla bazası var. Bizə qara zolaqdan çıxmaq, gücümüzə inanmaq üçün sadəcə, qələbə qazanmaq lazımdır. Gürcüstan yığmasına çağırılmağım daha çox özümdən asılıdır. Kaxaber Sxadadze Azərbaycan futbolunu yaxından izləyir. Bu üzdən də milliyə dəvət almaq şansım həmişə var. Bunun üçün yaxşı oynamağım və komandayla birgə uğur qazanmağım lazımdır. Bu da hələ ki, yoxdur. Belə vəziyyətdə yığmaya düşmək çox çətindir".
