Şəhriyar Rəhimov: Qarabağla matçın taleyini penalti həll etdi

"Kəpəz"in yarımmüdafiəçisi Şəhriyar Rəhimov Topaz Premyer Liqasının 5-ci turu çərçivəsində "Qarabağ"a qarşı keçirdikləri oyundan danışıb. Azerisport.az saytına açıqlamasında o, bunları söyləyib:

"Oyuna yaxşı hazırlaşmışdıq. Bilirdik ki, "Qarabağ" Gəncəyə birbaşa Londondan, çətin "Tottenhem" oyunundan sonra gəlir. Bundan istifadə edib, yaxşı nəticə qazanmaq istəyirdik. Təəssüf ki, alınmadı. Oyunun "Qarabağ"ın üstünlüyü şəraitində keçdiyini deməzdim. Bərabər səviyyəli oyun idi. Matçın taleyini böyük ölçüdə birinci hissədə bizim qapımıza təyin olunan penalti həll etdi. Həmin epizoda qədər "Qarabağ" təhlükəli vəziyyət yarada bilmirdi".

Rəhimov "Qarabağ"ın qapısına vurduğu ikinci qolun müəllifi olmasına da münasibət bildirib: "Əlbəttə, hər bir futbolçu qol vurmaq istəyir. Təəssüf ki, vurduğum qol komandama heç nə qazandırmadı".

"Kəpəz"in futbolçusu baş məşqçiləri olan Şahin Diniyevin rəqib komandada çıxış edən oğlu Coşqun Diniyevin dəqiq yerinə yetirdiyi penaltidən də danışıb: "Bu, futboldur. Coşqun öz komandasına fayda verməyə çalışırdı. Bunda təəccüblü heç nə yoxdur. Dünya təcrübəsində oğulun atasının və ya qardaşın qardaşa qarşı oynaması hallarına tez-tez rast gəlmək olur".

Penalti epizodlarında "Qarabağ"a məxsus olmasına baxmayaraq, "Kəpəz"də icarə əsasında çıxış edən Şəhriyar Əliyevin "xidməti"nə toxunan futbolçu bunları söyləyib: "Sabah Şəhriyarın yerində başqa futbolçu da ola bilər. Matçı tək Şəhriyar yox, bütün komanda uduzdu. Belə səhvlərdən heç kim sığortalanmayıb. Ola bilsin ki, bu oyunda özünü yaxşı tərəfdən göstərə bilmədi. Mümkündür ki, çox emosional imiş".