Vitali Borisov: Slovakiya ilə cavab matçında da üstün olduğumuzu sübut etməliyik

Futzal üzrə Azərbaycan yığmasının qapıçısı Vitali Borisov AÇ-2016-nın pley-off mərhələsi çərçivəsində Slovakiyaya qarşı cavab oyunu (ilk oyun 3:1) öncəsi azerisport.az saytının suallarını cavablandırıb.

- Slovakiya ilə cavab oyunu öncəsi nə düşünürsünüz?
- İlk oyunda biz daha artığına ümid edirdik. 3:1 hesablı qələbə bizim hələ AÇ-2016-ya vəsiqə qazandığımızı deməyə əsas vermir. Bizi çətin cavab görüşü gözləyir.

- Hər halda ilk oyunun nəticəsinə görə sizi cütün favoriti saymaq olar?
- Düzdür, 3:1 hesablı qələbə minimal üstünlükdən və ya heç-heçədən yaxşıdır. Amma 3-4 top fərqi ilə qələbə qazanmağımız daha yaxşı olardı.

- İlk oyun həm də Azərbaycan millisinin rəqibindən güclü olduğunu göstərdi. Bu, bizim şansımızı artırır?
- İlk oyuna əsasən belə demək olar. Amma biz öz üstünlüyümüzü cavab görüşündə də göstərməliyik.

- Səfərdə oynadığımızı nəzərə alsaq, fərqli oyun sərgiləyəcəksiniz?
- Baş məşqçinin bizə necə oynamağı tapşıracağından asılıdır. Əlbəttə, rəqibin də necə oynamasından çox şey asılıdır. Ola bilər ki, rəqibimiz ilk dəqiqələrdən beş meydan oyunçusu ilə çıxış etsin. Slovakiya bu taktikada çox güclüdür. Onlar bizə qədərki son oyunlarının hamısını elə keçiriblər. Hətta qalib gəldikləri, heç-heçə etdikləri halda da.

- Komandada arxayınlıq yoxdur ki?
- Qətiyyən! 3:1 futzalda elə də böyük üstünlük deyil. Ona görə də ilk dəqiqələrdən diqqətli oynamalıyıq.

- AÇ-2016-nın final mərhələsinin qoxusunu hiss edirsiniz?
- Hələ yox. Ümid edirəm ki, slovaklarla cavab matçından sonra hiss edəcəyik. Yeganə sevindirən məqam Slovakiyaya yaxşı əhval-ruhiyyədə gəlməyimizdir. İlk oyunda qələbə qazanmağımız da vacibdir.