Vitali Vernidub: Qəbələ növbəti oyunlarda daha yaxşı çıxış edəcək

"Qəbələ"nin müdafiəçisi Vitali Vernidubun azerisport.az saytına müsahibəsi

- Həftəiçi Avropa Liqasında Yunanıstan PAOK-una qarşı oyunun ardından "Sumqayıt"la çempionat görüşü baş tutdu. Bu, sizi yormur?
- Belə qrafiklə oynamaq Avropanın aparıcı çempionatlarında çıxış edən klublar üçün normal haldır. Məsələn, İngiltərə klubları üçün. Biz də belə gərgin qrafikə alışmağa çalışırıq. Oynamaq məşq etməkdən daha yaxşıdır.

- "Qəbələ"nin iki cəbhədə mübarizə aparmaq üçün gücü yetərlidir?
- Ümid edirəm ki, yetərli olacaq. Şəxsən mən özümü buna hazır hiss edirəm. Heyətimiz genişdir. Ona görə də hər oyunda rotasiyaya əl atılır.

- Avroliqanın qrup mərhələsindəki ilk matçınızda qolsuz heç-heçə qeydə alındı...
- Kimə qarşı oynadığımızı yaxşı bilirdik. İlk oyunumuzda ilk xalımızı qazandıq. Unutmayaq ki, bu, bizim qrup mərhələsindəki ilk addımımız idi. Müəyyən mənada nəticədən razıyam. Amma qələbə də qazana bilərdik.

- Bəs bunu reallaşdırmağınıza nə mane oldu ki?
- Qol vurmaq üçün şansımız oldu. Ola bilsin ki, bəxtimiz gətirmədi. Amma rəqibin də qol vurmaq şansları var idi. Bütün bunları nəzərə aldıqda, nəticənin ədalətli olduğunu demək olar.

- Amma PAOK-un qrup ikinciliyi uğrunda mübarizə apardığını nəzərə alsaq, bu komanda ilə doğma meydanda heç-heçə etmək heç də uğurlu nəticə sayıla bilməz. Bununla razısınız?
- Əlbəttə, biz də qələbə qazanmağı çox istəyirdik. Siz özünüz də gördünüz ki, irəli atılmışdıq. Qol vəziyyətlərimiz də var idi. Amma məyus olmağa, ruhdan düşməyə də dəyməz. Çünki bu, debüt, ilk oyunumuz idi. Fikrimcə, qarşıdakı oyunlarda daha da yaxşı çıxış edəcəyik. Sadəcə, səhvlərimiz üzərində çalışmağımız lazımdır. Qarşıda daha çətin oyunlarımız var.