Araz Abdullayev: Penaltini vura bilməməyim oyunumuza təsirini göstərdi
"Neftçi"nin kapitanı Araz Abdullayev Topaz Premyer Liqasının 5-ci turu çərçivəsində "Xəzər Lənkəran"a qarşı keçirilmiş oyundan (1:1) sonra azerisport.az saytının suallarını cavablandırıb.
- "Böyük oyun"la bağlı nə deyə bilərsiniz?
- Oyuna yaxşı başlamışdıq. Penalti qazandıq, amma reallaşdıra bilmədik. Birinci hissədə yaxşı oynadıq. Sadəcə, penaltini vura bilməməyim oyunumuza təsir göstərdi. İkinci hissədə qol vurub, üç xal qazanmaq istəyirdik. Qol vurmağa nail olsaq da, üstünlüyümüzü qoruya bilmədik. Rəqib azlıqda çıxış etsə də, bizə qol vurmağı bacardıq. Halbuki, bu qol bizim üçün çox gözlənilməz oldu. Belə bir oyunda iki xal itirməyimiz çox üzücü oldu.
- Penaltini niyə vura bilmədiniz?
- Orxan Sadıqlı penalti epizodunda mənim topu hansı küncə vuracağımı yaxşı "oxudu". Amma mən buna görə ruhdan düşmədim. Uşaqlar da məni dəstəklədilər.
- İkinci hissədə siz cərimə zərbəsini vurarkən top rəqib futbolçunun əlinə dəydi. Siz qayda pozuntusunun cərimə meydançasında baş verdiyini iddia edirdiniz...
- Dəqiq görmədim. Amma hakimin rəqib futbolçular üçün çəkdiyi spreyin yerini nəzərə alsaq, penalti olduğunu demək olardı. Lakin hakim penalti təyin etmədi. Yan xətt hakimi də bildirdi ki, zərbə zamanı rəqib futbolçular irəli atıldığından top cərimə meydançasından kənarda ələ dəymişdi.
- Hakimlikdən razı qaldınız?
- Hakimlikdən danışmaq istəmirəm. Oyun yaxşı alındı.
- Nəticə oyuna görə oldu?
- "Xəzər Lənkəran"ı öz meydanımızda qəbul edirdik və qələbə qazanmaq istəyirdik. Lakin heç-heçə də bizi ruhdan salmır.
- Qarşıda "Qarabağ"la oyun var...
- Kiminlə qarşılaşmağımızın bizim üçün fərqi yoxdur. Yaxşı oyun sərgiləyib, nəticə əldə etməyə çalışacağıq.
- Deməli, "Qarabağ"la oyuna da "Rəvan"la görüşə olduğu kimi hazırlaşırsınız?
- Yeganə fərq ondadır ki, ağdamlılarla oyun üçün əlavə motivasiyaya ehtiyac olmur. Rəqibimiz adlı-sanlı komandadır. Biz də onlara qarşı yaxşı oyun sərgiləməyə çalışacağıq.
