Adrian Skarlatake: Son vaxtlar bizə tez-tez qırmızı vərəqə göstərilir
"Xəzər Lənkəran"ın rumıniyalı müdafiəçisi Adrian Skarlatake Topaz Premyer Liqasının 5-ci turu çərçivəsində "Neftçi"yə qarşı keçirdikləri oyundan (1:1) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Şadam ki, bu qədər çətin bir vəziyyətdə olduğumuz halda bir xal qazanmağa nail olduq. Biz bu arenada ilk dəfə "Neftçi"dən xal almağı bacardıq. Mənim qırmızı vərəqə almağım komandanı pis vəziyyətdə qoydu. Buna görə məni bağışlamalarını xahiş edir.
- Qırmızı vərəqə ilə razısınız?
- İkinci sarı vərəqə ilə razı deyiləm. Mən tərəfdən qayda pozuntusu var idi, amma sarı vərəqəsiz keçinmək olardı. Niyəsini bilmirəm, amma son dövrlər bizə çox qırmızı vərəqə göstərirlər.
- Siz meydanda qalsaydınız, nəticə fərqli ola bilərdi?
- Demək çətindir. Sadəcə, onu deyə bilərəm ki, qırmızı vərəqə anına kimi bizim qol vurmaq üçün yaxşı imkanlarımız oldu. Rəqibdən daha öncə hesabı aça bilərdik. Bir sözlə, qələbə qazanmağımız mümkün idi.
- Heç-heçədən razısınız?
- Hadisələrin gedişatını nəzərə alsaq, nəticədən razıyam. Biz azlıqda oynayırdıq, hesabda geridə idik, səfərdə çıxış edirdik. Amma bütün bunlara baxmayaraq, buraxılan qolun əvəzini çıxmağı bacardıq. Bu nəticə bizim üçün çox vacib idi.
- XL hətta indiki vəziyyətində də "Neftçi"yə uduzmadı...
- "Neftçi" yaxşı komandadır. Amma biz də zəif deyilik. Səfər oyununda azlıqda qaldığımız halda qol vurub, heç-heçə etməyimiz buna sübutdur.
