Peskoviç: Mellinin belə manevr edəcəyini gözləmədiyim üçün qol buraxdıq

"Neftçi"nin qapıçısı Mixal Peskoviç Topaz Premyer Liqasının 5-ci turu çərçivəsində "Xəzər Lənkəran"a qarşı keçirdikləri oyundan (1:1) sonra fikirlərini bölüşüb. Azerisport.az saytına açıqlamasında o, paytaxt klubunun heyətində keçirdiyi debüt matçından sonra bunları söyləyib:

"Bu görüşdə üç xal qazana bilərdik. Amma bəxtsizlikdən ələ düşən imkanları boşa verdik. Təəssüf ki, qələbə qazana bilmədik. Meydanda daha yaxşı təsir bağışlayan tərəf biz idik. Amma birdən artıq qol vurmağı bacarmadıq".

Qolkiper qol buraxdıqları epizodda müdafiəçi Xuan Alberto Melli ilə bir-birini başa düşməmələrinə də münasibət bildirib: "Həmin epizodda kimin səhvə yol verdiyini demək çətindir. Mən Xuanın topu uzaqlaşdıracağını düşünürdüm. Onun belə bir manevr edəcəyini, topu mənə buraxacağını gözləmirdim. Ona görə də elə vəziyyət yarandı və biz qol buraxdıq".

"Neftçi"nin debütantı hakimlikdən də narazı qalıb: "Xəzər Lənkəran"ın futbolçuları bu oyunda təxminən 10 dəqiqə vaxt öldürdülər. Amma hakim bütün bunlara göz yumdu".

Peskoviç bəyan edib ki, "Xəzər Lənkəran"la "Neftçi" arasındakı oyunların necə prinsipial əhəmiyyət daşıdığını öncədən də bilirmiş: "Bu komandaların duelinin "Böyük oyun" adlandırıldığını eşitmişdim. Azarkeşlər üçün bu, çox vacib oyun idi. Ona görə azarkeşlərimizin sayının necə çox olduğu göz qabağındaydı. Əvvəlki matçlarımızla müqayisədə bu görüşə daha çox azarkeş gəlmişdi".