Dani Kintana: Londonda xal qazana bilərdik

"Qarabağ"ın yarımmüdafiəçisi Dani Kintana Avropa Liqasının qrup mərhələsi çərçivəsində İngiltərə "Tottenhem"inə qarşı səfər oyunundan (1:3) sonra azerisport.az saytının suallarını cavablandırıb.

- Oyunla bağlı nə deyə bilərsiniz?
- İngiltərənin ən yaxşı komandalarından birinə qarşı oynayırdıq. Rəqibin səviyyəsi hər kəsə bəllidir. Bizim qol vurmaq üçün yaxşı şanslarımız oldu. Amma yararlana bilmədik. Londondan xalla qayıda bilərdik. Ümid edirəm ki, Bakıda hər şey fərqli olacaq.

- Bu şansdan yararlanmağımıza nə mane oldu?
- Bu iki komandanın arasında səviyyə fərqi var. Onlar İngiltərə Premyer Liqasında çıxış edirlər, biz isə Azərbaycan. Onlar daha sürətli futbol sərgiləyilər. İngiltərə Premyer Liqasında oyunların necə sürətli keçdiyini hamı yaxşı bilir.

- Buna baxmayaraq, hesab 1:2 olarkən qol vurmaq üçün şanslarınız var idi...
- Mən özüm də bir dəfə qol vurmağa yaxın idim. Həlledici zərbəni dəqiq endirə bilmirdik.

- İngiltərədəki məğlubiyyət qrupdan çıxmaq şanslarınızı azaltmır?
- Bu, hələ ilk oyun idi. Qarşıda daha beş görüş var. Heç nə itirilməyib. Biz hələ rəqiblərimizə gücümüzü göstərəcəyik.

- Qarşıdakı "Kəpəz"lə oyuna köklənməkdə problem olmayacaq?
- Biz peşəkar futbolçularıq. İstənilən səviyyəli oyuna hazır olmalıyıq. Çempionatda da yüksək hədəflər uğrunda mübarizə aparırıq. Bizi çətin qarşılaşma gözləyir.