Elvin Yunuszadə: Qarabağ Londona uduzmağa gəlməyib
"Qarabağ"ın müdafiəçisi Elvin Yunuszadə Avropa Liqasının qrup mərhələsi çərçivəsində İngiltərənin "Tottenhem" klubuna qarşı səfər oyunu öncəsi azerisport.az saytının suallarını cavablandırıb.
- "Tottenhem"lə oyundan nə gözləyirsiniz?
- Bu komandanın gücü hər kəsə məlumdur. Burada artıq şərhə ehtiyac yoxdur. Allah eləsin ki, Londonda layiqli oyun sərgiləyə bilək. Nəticədən asılı olmayaraq, meydanda var gücümüzü qoyacağıq. Biz Londona uduzmağa gəlməmişik.
- "Tottenhem"in oyunlarına baxmısınız?
- Biz hər oyuna ciddi hazırlaşırıq. Rəqibin oyunlarını analiz etmişik, videomateriallara baxmışıq.
- "Qarabağ"ın Londondan uğurlu nəticə ilə qayıtması nə dərəcədə inandırıcıdır?
- Futbolda hər şey mümkündür. Çalışacağıq ki, yaxşı futbol sərgiləyib, uğurlu nəticə qazanaq.
- "Xəzər Lənkəran" üzərində qazandığınız son qələbə çox çətinliklə başa gəldi...
- Bəli, bu, doğrudan da çətin oldu. Rəqib bizə qarşı yaxşı mübarizə apardı. Üstəlik, süni meydan amili də bizə problem yaradırdı. Amma biz istədiyimiz nəticəyə nail ola bildik, 3 xal qazandıq. Bizim üçün çempionatın hər bir oyunu vacibdir. Başa düşürük ki, indi xal itkisi ilə üzləşsək, mövsümün sonunda bu, bizə baha başa gələ bilər. Ona görə də hər oyuna ciddi yanaşırıq.
- "Xəzər Lənkəran"la oyunun çətin alınmasına səbəb təsadüfən "Tottenhem"lə oyunu daha çox düşünməyiniz deyildi ki? Baş məşqçi də Rəşad Sadıqovla Qara Qarayevə istirahət vermişdi...
- Bizdə əsas və ikinci qapıçı anlayışı yoxdur. Hər dəfə fərqli heyətlə meydana çıxırıq. Rəşad, Qara oynamasa da, Reynaldo, Almeyda, Dani eydanda idi. Onlar da aparıcı futbolçulardır. Əsas odur ki, qalib gəldik.
