Qurban Qurbanov: Qarabağ heç vaxt rəqiblərindən çəkinməyib
"Qarabağ"ın baş məşqçisi Qurban Qurbanov Avropa Liqasının qrup mərhələsi çərçivəsində İngiltərənin "Tottenhem" klubuna qarşı səfər matçı öncəsi jurnalistlərin suallarını cavablandırıb. Azerisport.az xəbər verir ki, Ağdam klubunun çalışdırıcısı öncə bunları söyləyib:
- Bu, bizim Avroliqanın qrup mərhələsində ikinci çıxışımızdır. Təcrübə toplayırıq. Bir məşqçi kimi mənim özümə də belə rəqiblərlə qarşılaşmaq çox xoşdur. Rəqib barədə çox danışmaqda məna görmürəm. "Tottenhem"in gücü hər kəsə məlumdur. Matça yaxşı əhval-ruhiyyədə hazırlaşmışıq. Bacardığımız nədirsə, meydanda ən yaxşısını göstərməyə çalışacağıq. Oyunçularıma inanıram. Fikrimcə, onlar yaxşı futbol sərgiləyə biləcəklər.
- Azərbaycan klubu ilk dəfə İngiltərə təmsilçisinə qarşı oynayacaq. Sizcə, hansı çətinliklərlə üzləşə bilərsiniz?
- İngiltərə klubları həmişə İngiltərə futbolu sərgiləmirlər. Məsələn, "Tottenhem"in çalışdırıcısı argentinalıdır. Rəqibin yüksək səviyyəli futbolçuları var. Mümkün qədər hər şeyə hazır olmağa çalışacağıq.
- Londonda yağış gözlənilir. Bu, sizə problem yarada bilər?
- Təmiz İngiltərə havasıdır. Düzdür, havanın sabah necə olacağını dəqiq bilmirik. Dəyişə bilər. Hər halda oyunçularımıza maraqlı olacaq. Amma yağış təbii ki, müəyyən problem yarada bilər.
- Maksim Medvedev sıraya dönüb. Əsas heyətdə o oynayacaq, ya İlqar Qurbanov?
- Hələ qərar verməmişəm. Oyuna qədər düşünmək üçün vaxtım var.
- Yeni transferlərdən hansısa start heyətdə meydana çıxa bilər?
- İlk dəqiqələrdən də olmasa, sonradan meydanda olmaları mümkündür.
- "Tottenhem"in baş məşqçisi Maurisio Poçettino "Qarabağ"ı təhlükəli və güclü komanda adlandırıb...
- Biz rəqiblərimizdən heç vaxt çəkinməmişik. Rəqiblərimizin bizim haqqımızda belə müsbət sözlər söyləməsi isə onların bizi necə ciddi qəbul etdiyindən xəbər verir.
