Ansi Aqolli: Qarabağ öz rəqiblərindən qorxmur
"Qarabağ"ın müdafiəçisi Ansi Aqolli Avropa Liqasının qrup mərhələsi çərçivəsində İngiltərənin "Tottenhem" klubuna qarşı keçirəcəkləri səfər matçı öncəsi azerisport.az saytının suallarını cavablandırıb.
- "Tottenhem"in İngiltərə Premyer Liqasında "Sanderlend"ə qarşı son matçını izləmisiniz?
- Məşqdə olduğumuza görə həmin oyuna canlı baxa bilməmişdik. Amma sonradan video icmalına baxmağa imkan tapdım.
- Bu komanda hələ ötən mövsümkü formasını tam bərpa edə bilməyib...
- Onlar indiki halda da çox güclüdürlər. İstənilən halda, İngiltərə Premyer Liqasında çıxış edən komandaya qarşı oynayacağıq.
- "Tottenhem"i Çempionlar Liqası səviyyəsində klub saymaq olar. "Qarabağ" belə bir rəqibə qarşı layiqli mübrizə aparacaq gücdədir?
- Bizim qrupda yer alan komandaların hamısı ÇL səviyyəli klublardır. Biz də belə bir səviyyəyə qalxmağa çalışırıq. "Qarabağ" rəqiblərindən qorxmur.
- Çətin ki, kimsə sizin qarşıdakı oyununuza müsbət proqnoz verə. Bəs siz?
- "Tottenhem" öz meydanında oynayır və favoritdir. Çünki bizi çox ciddi rəqiblə duel gözləyi. Amma biz özümüz uğur qazanmağa çalışmalıyıq.
- Sizcə, ötənilki qrup mərhələsi ilə müqayisədə daha yaxşı nəticə qazana biləcəksiniz?
- Bunun üçün əlimizdən gələni edəcəyik. Ötən mövsüm qrup mərhələsində keçirdiyimiz oyunları yada salmaq istəməzdim. Xüsusilə də bizi pley-offdan məhrum edən məlum hakim səhvini ümumiyyətlə xatırlamaq istəmirəm. Bu dəfə rəqiblərimiz çox güclüdür. Hər bir iştirakçının qarşısına qrupdan çıxmaq hədəfini qoyduğu şübhə doğurmur.
- Avroliqanın qrupunda Albaniya təmsilçisi "Şkenderbeu" da çıxış edəcək. Sizcə, albanlar bu klubla yanaşı, "Qarabağ"a yenə dəstək göstəcəklər?
- Ölkəmizdə albaniyalı futbolçuların formasını geyindiyi istənilən komandaya zarkeşlik edirlər. Ona görə "Qarabağ" da Albaniyada pərəstiş edilən komandalardandır.
