Rəşad Sadiqov: Qrupdan çıxmaq üçün əlimizdən gələni edəcəyik
"Qəbələ"nin yarımmüdafiəçisi Rəşad Sadiqov Avropa Liqasının qrup mərhələsi çərçivəsində Yunanıstan PAOK-una qarşı keçirəcəkləri oyun öncəsi azerisport.az saytının suallarını cavablandırıb:
- PAOK-la vacib oyun öncəsi çempionatda "İnter"ə məğlubiyyət komandanızdakı atmosferə təsir etməyib ki?
- Düşünmürəm. Biz peşəkar komandanın üzvləriyik. Ona görə də bir oyuna görə hər şeyin üstündən xətt çəkə bilmərik. Öz gücümüzə kifayət qədər inamımız var. Qısa zamanda bərpa olacağımıza da şübhə etmirik. Avrokuboklarda oyuna çıxmağın özü də əlavə emosiya deməkdir.
- Sizə elə gəlmir ki, PAOK-la ev oyunu ilk dəfə vəsiqə qazandığınız Avroliqanın qrup mərhələsinə qələbə ilə başlamaq üçün əla şansdır?
- Fikrimcə, siz haqlısınız. Biz qələbəyə oynayacağıq. Bu qələbə bizim üçün yaxşı perspektiv də yarada bilər. Qrupdan çıxmaq istəyiriksə, evdə keçirəcəyimiz bütün oyunlarda qələbə qazanmalıyıq.
- Rəqibləriniz barədə hansı fikirdəsiniz?
- Dortmund "Borussiya"sı (Almaniya) barədə ətraflı danışmağa ehtiyac da yoxdur. PAOK və "Krasnodar"a (Rusiya) gəlincə, onların arasında zəif rəqib axtarmağa dəyməz. İkisi də bərabər səviyyəli komandadır. Amma biz hər bir rəqiblə mübarizə aparacaq gücdəyik. Növbəti mərhələyə adlamaq üçün əlimizdən gələni edəcəyik.
- "Neftçi" ilə buna nail ola bilməmişdiniz...
- (gülür) Elə ona görə də bu dəfə qrupdan çıxmağı çox istəyirəm.
- "İnter"ə məğlubiyyət sizin çempionluq iddialarınıza təsir etməyəcək?
- Hiss olunurdu ki, rəqib bizimlə oyuna yaxşı hazırlaşmışdı. Biz iki səhvə yol verdik, "İnter" bu şansdan yararlandı. Amma bizim oyundan qalib ayrılmaq üçün kifayət qədər qol vəziyyətimiz oldu.
- "Qarabağ" sizdən aralanmağa nail oldu...
- Bu xal itkilərini növbəti turlarda unutdurmaq lazımdır. Bu mövsüm bizim yüksək hədəflərimiz var. Çempionatın startında bu qədər xal itirmək olmaz.
