İlqar Qurbanov: Qarabağ sanki ÇL-in qrupundadır
"Qarabağ"ın yarımmüdafiəçisi İlqar Qurbanov Topaz Premyer Liqasının 4-cü turu çərçivəsində "Xəzər Lənkəran"a qarşı keçirdikləri oyundan (1:0) sonra azerisport.az saytının suallarını cavablandırıb:
- "Xəzər Lənkəran"la oyunda çətinliklə qalib gəldiniz. Baxmayaraq ki, üstünlük tamamilə komandanızın tərəfində idi...
- Bəli, biz bu oyunda istədiyimiz kimi oynadıq. Çoxlu qol vəziyyəti də yaratmağa nail olduq. İkinci hissədə 4-5 belə vəziyyətimiz oldu. Sadəcə, ələ düşən şanslardan yaxşı yararlana bilmədik. Yeni futbolçumuzun - Samuel Armenterosun bu oyunda qol vurması sevindirici oldu. Bu, onun üçün qarşıdakı oyunlar öncəsi yaxşı motivasiya olacaq.
- Birinci hissədə solda oynayırdınız, fasilədən sonra isə Maksim Medvedevin mövqeyinə - sağa keçdiniz. Matçın gedişində belə bir yerdəyişmə çıxışınıza təsir göstərmədi?
- 5-10 dəqiqə mövqeyinə alışırsan. Çox mövqedə oynamışam. Ona görə də mənə istənilən mövqedə oynamağa alışmaq çətin deyil.
- Bu qələbə yəqin ki, "Tottenhem"lə qarşılaşma öncəsi xüsusi əhəmiyyətə malikdir...
- "Xəzər Lənkəran"la oyunda qələbə qazanmağı çox istəyirdik. Bu üç xal bizə çox lazım idi. Avropa Liqası ilə yanaşı, çempionatda da hədəflərimiz var və hər oyunun çətin keçəcəyini bilirik. Hər bir rəqiblə görüşə xüsusi və ciddi hazırlaşmaq lazım gəlir. Artıq lənkəranlılarla görüş geridə qaldı. Bundan sonra ancaq "Tottenhem"lə oyunu düşünəcəyik.
- "Qarabağ" Londonda hansı nəticəyə ümidlidir?
- Çətin oyun olacaq. Rəqib barədə xüsusi nəsə deməyə ehtiyac da yoxdur. Düzünü deyim ki, belə çətin bir qrupa düşəcəyimizi gözləmirdim. Sanki, Çempionlar Liqsının qrupuna düşmüşük. Amma "Tottenhem", "Monako" və "Anderlext" kimi klubları Bakıya gətirəcəyik. Layiqli mübarizə aparmağa çalışacağıq.
- Belə çıxır ki, bu komanda ilə səfər oyununda sizdən qələbə gözləməyə dəyməz?
- Futbolda hər şey mümkündür. Rəqib həm uzun, həm də qısa ötürmələrdən istifadə edir. Lazım gələndə aqressiv futbol sərgiləyir. Çətin olacaq.
