Ruslan Abışov: Qəbələnin bu mövsüm çempion olmaq şansı daha çoxdur
Azərbaycan yığmasının və "Qəbələ"nin müdafiəçisi Ruslan Abışovun azerisport.az saytına müsahibəsi
- "Xəzər Lənkəran"a uğursuz keçidinizə görə təəssüflənmirsiniz?
- Mən belə deməzdim. Futbolda belə hadisələrdən heç kim sığortalanmayıb. Bunu anlayışla qəbul etmək lazımdır. Klub rəhbərliyi ilə də bir-birimizi yaxşı başa düşdük və qarşılıqlı razılıq əsasında yollarımızı ayırdıq. Fikrimcə, "Xəzər Lənkəran" gənc heyətlə də uğurlu mübarizə aparacaq.
- "Neftçi" və "İnter"ə də keçidiniz gündəmdə olduğu halda, "Qəbələ"yə qayıtmağa üstünlük verdiniz...
- "Qəbələ" üçün darıxmışdım. Mən heç çempionatda keçirdiyimiz son oyunumuzu, bürünc medalları aldığımız tədbiri unutmamışdım. Necə yaxşı komandamızın olduğunu da hamı yaxşı bilirdi. Mən özümü "Qəbələ"də yaxşı hiss edirəm.
- Siz həmin mükafatlandırma mərasimində azarkeşlərə növbəti mövsümdə çempionluq sözü vermişdiniz. Bu sözünüzü tuta biləcəksiniz?
- "Qəbələ"də çox güclü futbolçular cəmləşib. Həm yerli, həm də əcnəbi futbolçuları yüksək keyfiyyətə malikdirlər. Ona görə də bu mövsüm əvvəlki ilə müqayisədə çempionluq şansımız daha çoxdur.
- Siz Avropa Liqasının qrup mərhələsində komandaya kömək edə bilməyəcəksiniz...
- "Qəbələ"yə qrup mərhələsində kömək etməyi çox istəyərdim. Görünür, qismət deyilmiş. "Rubin"lə bu turnirdə oynamışdım. Amma "Qəbələ" ilə qrupda oynamaq tamamilə fərqli hisslər olardı. İnanıram ki, "Qəbələ" ilə Çempionlar Liqasının qrup mərhələsində çıxış edə biləcəyəm (gülür).
- Komandanız artıq bu həftə ilk oyununda PAOK-la qarşılaşacaq...
- Yunanıstan klubu çox güclüdür. Amma komandamız da əvvəlki oyunlarında istənilən rəqibə qarşı mübarizə aparmaq gücündə olduğunu isbatlayıb. "Qəbələ"nin potensialı daha artığına nail olmağa imkan verir. Uşaqlar baş məşqçi Roman Qriqorçukun tapşırıqlarının heç olmasa, 70 faizini yerinə yetirə bilsə, istənilən rəqibdən 3 xal almaq olar.
- Qriqorçuk sizi necə qarşıladı?
- (gülür) Yaxşı. Şadam ki, yenidən onun rəhbərliyi altında oynayacağam.
- Robert Prosineçki ilə oyun təcrübənizin az olması ilə bağlı söhbətiniz oldu?
- Bəli, bu barədə söhbətləşdik. O, mənim klubdakı işlərimlə maraqlandı, məslətlərini verdi. Bildirdi ki, yığmamızın İtaliya və Bolqarıstanla oyunlara hazır olmağım lazımdır. Bu dəstəyinə görə ona təşəkkürümü bildirirəm.
