Mirhüseyn Seyidov: Hiss olunur ki, rəqibləri Qarabağla Qəbələyə yuxarıdan aşağı baxmırlar

"İnter"in yarımmüdafiəçisi Mirhüseyn Seyidov Topaz Premyer Liqasının 4-cü turu çərçivəsində "Qəbələ"yə qarşı oyun öncəsi fikirlərini açıqlayıb. Azerisport.az saytına açıqlamasında o, bunları söyləyib:

"Fasilədən yaxşı yararlandıq. Hər şey normal keçdi. Çempionatın qarşıdakı oyunlarına hazırlaşdıq. Qış fasiləsinə qədər çox oyunumuz var. Ona görə də həmin oyunlara mümkün qədər yaxşı hazırlaşmağa çalışdıq".

Seyidov çempionatın ilk üç turundakı çıxışlarına da toxunub: "İnter" 4 xal toplayıb, beşinci yerdə gedir. Fikrimcə, normal çıxış etdik. Hələ qələbə və xallar qazanacağımız çox oyunumuz olacaq. Avropa Liqasından sonra çempionata köklənmək bir qədər çətin idi. Həm də komandamız yenidir. Amma hər şeyə rəğmən mövsümə yaxşı start verdik".

Yarımmüdafiəçinin sözlərinə görə, onların bu mövsüm üçün öz hədəfləri var: "Minimum hədəfimiz Avroliqaya vəsiqə qazanmaqdır. Amma buna nail olmağa hələ çox vaxt var. Hər oyunda maksimum nəticəyə çalışmalıyıq. Buna da indidən başlamaq lazımdır. Özü də bunu sözdə yox, əməldə etmək lazımdır".

Seyidov "Qəbələ" ilə oyunla bağlı gözləntilərini də dilə gətirib: "Bizi heç də asan oyun gözləmir. Onlar hazırda çox yaxşı formadadırlar. Amma biz də öz istəyimizə çatmağa çalışacağıq.

Yeri gəlmişkən, bu komandanı Avroliqanın qrup mərhələsinə çıxması münasibətilə təbrik edirəm. Mən onların uğur qazanacağına öncədən də əmin idim. Çünki komanda çox böyük istəklə oynayırdılar. "Qarabağ"ın da avrokuboklar təcrübəsi çox böyükdür. Hər iki komandamız çox çətin qrupa düşüb. Buna baxmayaraq, əminəm ki, onlar uğur əldə etmək, mümkün qədər çox xal qazanmaq üçün əllərindən gələni edəcəklər. Hər iki komandamız üçün nə qədər çətin olsa da, uğur qazanmaq şansı var. Elə rəqiblərin açıqlamalarından da görünür ki, onlar "Qarabağ"la "Qəbələ"yə yuxarıdan aşağı baxmırlar".